Sit miner letschte grosse Reis isch scho wieder viel Zit vergange, ich han z Arosa dr Gigi kenneglehrt, han dörfe d Schönheit vo Skandinavie entdecke. Zrug i dr Schwiz, hets mi wieder in d Berge zoge und i han uf dr Alp glehrt Geisse mälche.
De bin ich in dr sicilianische Sunne go italienisch lehre und han mich in Locarno nieder glo.
Während däm hani Zit gfunde zum in Wien go Rieserad fahre, in Brasilie mir Zöpfli lo flächte, der östrichisch Jägermeister z probiere, es Erinnerigsföteli vom Manneken Pis z schiesse und s Nessi im Loch go sueche.
Zrugg im Tessin han ich ä neui Useforderig a dr Rezeption vom Hotel Luna a gnoh, aber die Saison isch super schnell verbi gsi und i han mini siebe Sache in Chiste packt und bin wieder dehei in Gelterchinde.

Letscht Wuche bin ich in Granada mini Reisendi Kollegin d Katharina go bsueche und han die aarabischi Vergangeheit vo Spanie entdeckt. Mir hei eus bim Hamam lo verwöhne und i han dörfe die unglaublichi Schönheit vo dr Alhambra uf mi lo wirke.

Wieder dehei han i mi riesig gfreut wo di wissi Pracht, lisli vom Himmel grislet isch.
I bin so glücklich das i doch no chli Schnee und Winter han, bevor s de losgoht am 12.12.12!


Entdeckungsreise II

S Flugi bringt mi uf Johannesburg, dört foht mis Afrikaabentür a. Ich wirde witer südlich Reise und de am 24.12.12 in Durban ime Hostel am Strand für en Monet schaffe.
Nochher gohts witer richtig Oudtshoorn, Stellenbosch und Kapstadt und de isch scho wieder en Monet verbi.
In Kapstadt wird ich mit "Drifters" uf e Tour durch Namibia, Botswana, Simbabwe und zrug nach Johannesburg go.
Am 20.03.13 wird ich mini Reis in Madagaskar fortsetze, do wird ich sehr wahrschiendlich zerst südlich reise, do das Gebiet de weniger vo dr Regezit betroffe isch. Mol luege was dört alles so uf mi zue chunt.

Am 03.06.13 bringt mi de dr Flieger wieder zrugg nach Europa und es isch plant das ich am 04.06.13 am 20.30h in Basel wird lande... =)

Jetzt bin ich voller Vorfreud und hoffe euch ab und zue vo mim Erläbte chöne z brichte.



Ursi

Bald gohts los...