Mini Entdeckigsreis

Eimol Dschungel und zrug

2009-07-24T09:20:00.000-07:00

La Paz

Bolivie isch wuerkli gfoehrlich, es het vili,vili Bakterie im Aesse! Jo es het mi churz vor mim Dschungel - Tripp am Samstig, flach gleit. Dank Simi Magedarm - Chuegeli het sich mi Koerper obe und und vo de Bakterie befreit und nochher bin ich so mued gsi das ich fast 24 Stund gschlofe han. Allso nid so dr besti Start zum Bike.
Am Sunntig han ich mi scho extrem vil besser gfuehlt und han mich ufgmacht, nach Sorata. Am noechste morge in dr fruehi sind mir de au gstartet, mit em Chip si mir bis uf 4800m hoehi, hei en wahnsinnigi Ussichtgnosse und de isch es los gange! Ueber Stock und Stei si mir mit de Bikes dr Berg ab gsutteret. Das isch astraengender als me denkt und ich ha eifach mim Bike vertraut das es die Huerdene nimmt. Ich ha au die ganze 2 Taeg ohni Bruchlandig gmeisteret, doch mir hei scho es paar Stuerz mit blaue Flaecke gha.
Bim flache Bergufstrample han ich de scho gmerkt das mini Chraeft nid hundertprozentig do sind. Doch ich has dure zoge!
Noch zwei Taeg uf em Bike, het mi Hinter und mini Aerm zimmli weh do. Do sind doch 3 Taeg Bootsfahrt grad glaege cho :)
Gmuetlich si mir dr Fluss ab tueckerlet. Es isch grad Trochezit und das heisst das dr Fluss sehr nieder isch, so sind mir grad am Afang ueber d Stei gschliferet und fast us em Boot kippt! Bi Schwellene si mer ame chli nass worde, doch suscht si mir heil acho. Unterwegs hei mir es paar Affe, Flussschildchroete und huffe Mugge und Sandfloeh troffe.

Dschungel

Ich han mich de gege di turistischi Pampastur entschide und bi zu me Wildchatze - Projeckt. Die bruche Luet zum ihres Camp ufbaue. So han ich mitghulfe es Doppelbett z baue, ohni Strom!!! Das heisst saege und haemmere...
Dr Ort isch wunderschoen gsi, ueberall sind farbepraechtigi Schmetterling umegflatteret und de han ich erst no en Tukan gseh. Nach zwei Taeg bin ich de wieder zrug ind d Zivilisation. Dr Weg zrug isch einmalig gsi, zerst si mir 1 1/2 Stund gloffe eifach gradus, mit eme herrliche Panorama vo Wolke, Palme, Wiese und dr Sunneuntergang im Rugge. De aentlich isch es Auti vorbi gfahre, doch nei das het eus zwei huebsche ( D Maddy, ae Englaendere und i )nid woelle mitneh! Doch de isch en Laster cho und mir si ueber es Leiterli ufe kraxlet. Im Laster hets ae huffe Holz gha und es paar Cokablaetter - chauendi Maenner. So hei mir eus mued hi gsetzt und scho gli het en einmalige Staernehimmel ueber eus gfunklet! De bim Fluss acho, hei mir nomol en Marsch vo 15 Minute gha, de es Boot ueber dr Fluss und de si mir todmued is Bett gsunke!

Denn bin ich mit em Horrorbus vo 20 Stund zrug nach La Paz. D Fahrt saelber han ich gar nid so schlimm gfunde. Dummerwies bin ich in dr hinterste Reihe ghockt und dort holperets am meiste! De bin ich zerst 2 mol an en andere Platz verwiese worde, doch alles i dr hinterste Reihe! Links vo mir isch ae jungi Familie gsi mit 2 Chind. Dr Vater, Hanfvertrieber mit ere che Chappe und eme Hitlerchruez - Taetowierig uf em Handglaenk ( Ich nimme nid a das er wuerkli weiss was er doert fuer es Symbol zur schau treit), het doch tatsachlich sini Cheesfuess uspackt und zu mir uf mini Armlaehne gstellt, als oeps nid scho gnue gschweisselet haetti im Bus! Rechts vo mir han ich es naetts Maitli gha mit ihrem Hund, wo doch gern sini Nase zu mir uebere gstreckt het. Villicht daenket ihr es cha nid schlimmer cho, doch do tueschet ir euch. Die gueti Familie het ihrne Chinder keini Windle a gleit und so hei die naett an Bode pisst. So was choent jetzt das Dufterlaebnis no abrunde? Jo klar dr Vater wo allbot wieder eis kifft het. Bis in la Paz isch es de isig chalt worde, ich han gfrohre und bi doch de gluecklich gsi zum usstige.
Jetzt han ich en 14h Busfahrt nach Sucre vor mir, mol luege was es de vo doert z brichte git.

Canyon, Insle und scho bin ich in Bolivie!

2009-07-09T16:02:00.000-07:00

Arequipa

In Arequipa hei mir dr zweittiefsti Canyon vo dr Welt. So han ich doch im Morgegraue ufgmacht um dae go besichtige. Z erst hei mir en Stopp gmacht um dr groesti Vogel vo de Ande z besichtige, dr Kondor. Das isch wuerkli ae riesigs Tier und we s de no fast ueber din Kopf fliegt isch das scho idruecklich!
Bi bruetender hitz si mir de 1300m in d tiefi gstige, dr Staub hets Atme fast unmoeglich gmacht, doch wit, wit unde hei mir euses Ziel vor Auge gha: ae Swimmingpool! Es isch wie e chlini Oase gsi doert unde, dur di goegrafisch lag hei si doert im Canyon so was wie es tropischs Mikroklima und es wachse Mangos, Fiege und Palme. Fruehner het doert ei Familie vo eim Fruchtbaum choene laebe, isch das nid wahnsinnig! Huet laengts leider nuemme und es het dur de Klimawechsel au vil weniger Fruecht.
Am naechte morge si mir mit Taschelampe los, damit mir nid in dr Hitz muend dr Berg uf laufe und so han ichs in stolze 2 1/2h gschafft gha! De hei mir eus de s Zmorge verdient gha.
Uebrigens die ganzi Tur han ich bi PeruSchweiz buecht und dr Chef doert isch au scho in dr Schwiz gsi und het mir "ewigi liebi" und "grueziwohl Frau Stirnimaa" vorgspielt. Das het doch grad Heimatgfuehl und es chrible im Buch usgloest. Soooo schoen! De si mir gmuetlich zaeme go zNacht esse und de het er de wieder uf "ewigi Liebi" agspielt, doch das Agebot han ich de fruendlich abglehnt.

Titikakasee, dr hoechsti befahreni See

Dur Zuefall han ich im Busbahnhof en lessigi Luzernere kenneglehrt und mit ihre bin ich de go dr Lago Titikaka entdecke.
Zerst vo dr Peruanische Site, wos si so Schilffinsle agleit hei um vor de Spanier z fluechte. Das si ganz lustigi Insle, zum Abschied hei si eus "Vamos a la playa" vorgsunge. Voll Turisteschrott!!, aber lustig.
De sind mir uf en groesseri Insle Amatani, hei noch eme chuechige Ufstig chraft tankt bi Inka Ruine. D Nacht hei mir bi ere indigene Familie verbrocht, Solarstrom fuer Liecht hei si gha, doch kocht het me immer no ueberem Fuer. I dr nacht hei mir de traditionelli Chleidig becho und sind an en Folkloreobe fuer Turis go tanze. Es isch lustig gsi , chli wie Fasnacht, und het warm geh. So uf 4000 m isch es naemmli zimmli chalt i dr Nacht! Uff em Heiwaeg han ich mi de Tatsaechlich no dr Fuessvertrampt! er isch grad ufs dopplete agschwulle, doch mit der richtige salbi han ich das schnell im Griff gha.
Bi dr noechste Insle hei mir de di strickende Maenner kenneglehrt und an ihrne Chappe cha me erkenne oeb si scho verhuerotet si. Do han ich nid schlaecht gstunt wievil aelteri Herre no solo si.

Isla del Sol, Sunneinsle in Bolivie

Mit eme luute woooouuu, hei mir d Grenze nach Bolivie ueberschritte. Natuerlich hei si de a dr Grenze ganz genau woelle wuesse oeb mir Gsund sind und kei Schweinegrippe ischleppe. Selbstverstaendlich han ich nie es Schnueppeli gha :-)
Die bolivianischi Site isch vil schoener und en Sunneuntergang ich saeg euch, eifach traumhaft! Im Mondschien sind mir de mit em Boetli zur andere Inselsitegfahre, frueh am Morge ufgstande und dr Sunneufgang gnosse. do stoht me wuerkli gern uf.

Jetzt bin ich in La Paz dr groeste Stadt vo Bolivie, eigentli isch das nuet fuer mi und doch faszinierts mi jede Tag me. Es isch chaotisch, stinkt nach Abgas und alles, wuerkli alles wird uf dr Stross verchauft. Bim Haexemaert gits sogar troechneti Lamababys vo abort und die bringe glueck we me es Huus baut.
Was dr scharm vo dr hoechste Stadt vo dr Welt usmacht isch das si zwuesch ere einmalige Bergwelt lit. D Hueser si do eifach in Fels baut und gsehnd oftmols isturtz gfoehrdet us! Sicher d haelfti vo ihne si nid vertigbaut und einigi si nume ei-Zimmer gross. Es het aber au einigi Hochhueser!
Do im Hostel hei vil Magedarm Problem, do mues me nomol meh ufpasse was me isst. Bis jetzt bin ich no verschohnt blibe!

Jetzt freu ich mi uf dr Dschungel, 2 Daeg Downhill bike und de 3 Taeg mit em Boot in Dschungel schiffe. Das wird abentuerlich :-)

Peru

2009-06-27T08:26:00.000-07:00

S Laebe

S Laebe do in Peru isch halt scho ganz anders... Es isch immer heikel so oepis in Wort z fasse, doch ich wag trotzdem en versuech. Es isch es arms und urtuemlichs Land, wenn de so dur d Gasse schlaenderisch ime chline Bergdorf und so en Blick dur d Huustuere wirfsch, denn gsesch eifach dr puri Lehmbode, es Fuer in dr Chochnische und ae waggelige Tisch. Doch dr Vortschritt isch au do vorhande denn ime Egge stoht dr Fehrnseh, wo dr ganz Tag lauft. Oder triffsch Buure uf em Feld, oder Wanderer mit de Esle. Jo si sind z Fuess unterwaegs oder hacke s Feld vo Hand, doch um dr Hals haengsts Radio. Also au do goht me nuem ohni Musig us em Huus.
Im allgemeine choeme mir d Luet do sehr froehlich und gsproechig vor, ae offeheit und doch ueberalles stolz uf ihr Land!

Santa Cruz Treck

4 Taeg durch di hohe die hohe Lage vo de Ande wandere. Uff ei site en Kampf um dr Suurstoff und uf die ander Site aes Gschaenk mit tuusige Bilder und Irdueck vo de Baerge, Schnee und Seeae. Jae ich ha 3 Naecht gfrohre, schlecht gschlofe und nid duscht. Do fuehlsch di wie es Stinktier, de gsehsch en See, weisch genau das er iisig chalt isch und doch springsch dri, bechunsch fast kei Luft wils so chalt isch und trotzdem gohts dr eifach scho vil besser nochher! Ich han en mega lessigi Gruppe gha und so hei mir die chalte oebe mit Spiel und Gschichte verzelle vo Erlaebtem gfuellt. Zrugg im Hostel nach ere laaange Duschi bin ich de wieder ich gsi! Dr Obe hei mir de gfiiret mit eme Fondue, das isch witzig gsi. Vor allem will unse Teckingfuehrer zum erste mol i sim laebe so gschmolzene Chees gaesse het. Sis Urteil: Scho chli ae komischi Sach, aber aessbar:)

De bin ich mit eme Bord Sandduene abgrutscht, mit eme chline Flugzueg ueber die mysterioese Linie im Sand gfloge und has Sunnefest vo de Inkas bsuecht.

Cusco, Peru

Jo jetzt bin ich do im Zentrum vo dr Gschicht vo de Inkas. Mit vil Muusig, Farbige Kostuem und Taenz sind si do dur d Stadt zoge. Interessant isch gsi, dr Wissi Maa stelle si immer mit ere lange Nase dar und ere Bierflaesche in dr Hand.
S Sunnefest isch me es Theater wo si de Goeter es Lama opfere fuer en gueti Ernt. Es isch sehr komerziell, haet grad so guet chonte dr Izug vo dr Kleopatra darstelle. Vor allem haend si d Sitzplaetz fuer 90 Doller verchauft, das isch eifach wahnsinnig! Grad wil jo das es Fest vo do isch und Iheimisch das nie und niemmer choene zahle! Me cha das Schauspiel aber vo de Huegel us ohni z zahle vo de Huegel us besichtige, zum Glueck. Es ischs Gaeld naemmli nid Wert.
Im grummel vo de Luet hei si mir de no mini Taesche ufgschnitte und mis Portmonnaie klaut. Doch ich ha nuet wuerkli wichtigs verlohre, Pass und Bankcharte si alli no do. 40 Soles (Fr. 13.--), mi Fahruswies, ID und Versicherigscharte si weg. En pensionierte Duetsche, het mir de umbedingt die 40 Soles woelle geh und mi zum z Nacht iglade. Wieder einisch han ich viel Glueck im Unglueck gha:)

Machu Picchu

Dr Hoehepunkt vo allne Perureisende! Mit em Zug, wo es schweinegaeld chostet und nur fuer Touris isch, bin ich zum Fuess vom Machu Picchu tuckerlet. D Ussicht mit em riessende Fluss un de Berge im Morgendliche Naebel isch scho herrlich. Unterwaegs hei mir dr Peruanerzug kreuzt, en normale Zug ohni Luxus, wie spannend waer das gsi mit de Iheimische e bitz z blaeudere bim fahre. Leider unmoeglich!
De han ich mich z Fuess die steile Traeppe zum Gipfel uf gmacht. Scho nach churzer Zit het en junge Peruaner mi begleitet und mir si Stock a bote. Noch eme wili het er de au umbedingt woelle mi Rucksaekli traege, so bin ich doch scho mit vil liechtere Schritt duruf. Es het sich de usegstellt das er Reisefuehrer isch und er het mir de die ganze Ruine vo de Inkas erklaert und zeigt. So bin ich gratis zu ere gfuehrte Tur cho, maengisch hets au Vorteil Frau z sieh.
Grad en Tag vorher han ich aber wieder mol en schlaechti Erfahrig mit eme Taxichauffeur gha, wo mir vil z vil Gaeld het woelle verlange. So hets ahlt immer beides.
Mis fazit vom Machu Picchu, sicher spannend doch nid mis Higlight vo Peru.

Berg und Tal

2009-06-13T08:40:00.000-07:00

Vilcabamba Ecuador

Ich saeg euch das isch en Traumhafte Ort, zmitz i de Berge. Mit em Zug bin ich vo Baños in Suede Tuckerlet, richtig Vilcabamba. Das isch fruehner mol en richtigi Dampflocki strecki gsi, wo me het doerfe uf em Dach mitfahre und die herrlichi Ussicht gniesse. Noch eme tragische Unfall het me dr Zug dur en Bus uf schiene usgwaechslet und me darf nuem ufs Dach. Doch das isch immer no es speziells Erlaebnis gsi das Tal entlang z fahre. Wos steil durab goht, fahrt me eifach ruckwaerts, wils fuer en Kurve z eng isch. Unde acho gseht me de d Nariz del diablo, en Berg wo d Form vo nere Tuefelsnase het.
In Vilcabamba acho han ich chli das gmuetliche Oertli gnosse und bi de uf en Wanderig gange. Zerst isch es ufe uf en Berg und de dr Bergkrete entlang, do han ich mich de frei gfuehlt mit ere unendliche ussicht und links und rechts isch es steil abwerts gange. Noch em Abstig, bin ich im ustroechnete Flussbett zrug glofe. Doisch grad s Gegeteil dr Fall gsi, ich han links und rechts Felswaend naeb mir gha und ghofft das do nuet obenabechunt. De fuehlsch di chli und dr Natur usglieferet. Es isch so herrlich d Natur z entdecke!

Peru

Nach ere Nacht und Tag im Bus bin ich in Peru bim Schaman acho. Dr ersti isch so betrunke gsi, das mir mit ihm uf kei fall hei woelle es Wiedergeburtsritual hei woelle mache. Doch doert obe in de Berge hei mir schnell en andere gfunde.
Mir hei eus de in so oepisem wie en Stall usgrueht und am 22.00h het de s Ritual agfange. Mit huffe Parfume und schuettle, gumpe, konzentriere hei mir euse Geist goeffnet und uns vom boese befreit, damit mir alles Guete hei choene empfange. Am schlimmste isch gsi wo mir hei muesse fluessige Tabak in d Nase ufe schnupfe, das het brennt wie d Sau! De het dr Meister mir mis Astro zeigt, mir hei an bewoelkte Himmel ufe gluegt und in dem Moment si d Wolke ufgrisse und ich han d Sterne gseh! Do het er gmeint das ich es langs gluecklichs Laebe wird ha, das isch doch toll!
Ich han mich irgendwie voll Energie gfuehlt, doch es isch schwierig gsi sich uf en Wunsch z konzentriere we me scho gluecklich und gsund isch. So bin ich hauptsaechlich dankbar gsi fuer ,dass das ichs so guet han. Han au an euch denkt und nur die beste Wuensch in d Nacht use gschickt.
S Geld isch fuer si bim Ritual sehr wichtig gsi, do han ich de ebe wieder die kulturelle Unterschied gmerkt. Peru isch ebe wieder es viel aermers Land, als Ecuador oder Kolumbie. Es isch wieder vil dreckiger und chaotischer.
Zrug zum Ritual, ipuderet und parfuemiert si mir de es paar Stuendli go schlofe. Im morgegraue hets de Rys und Mais mit eme uebersuesste Kaffi zum z Morge geh. De sind mir mit de Bestie zum See gritte. Yae de 2 stuendig Multierritt isch en tortur gsi! Am See acho haend mir witeri Ritual vorgnoh, wider Tabak gsnifft und den in ischalte See uns go reinige und de si mir doch nochher wie Neu gsi. Amel fast...
Nach witere 2 Stund uf em Muli Rugge han ich mich de uf jede Fall ueberhaupt nuem wie neu Gebore gfuehlt und ha fast nuem choene laufe wo ich abgstige bin!
Es isch uf jede Fall es eimaligs Erlaebnis gsi und ich fuehl mich vor allem dankbar fuer mis Glueck.
Jetzt bin ich in de Berge in Huaraz und in es paar Taeg wenn ich mich and d hoechi gwoehnt han mach ich mi uf, uff en 4 taegige Treck.
jup, bi euch wirds warm und ich gang in Winter....

D Berge vo Ecuador

2009-05-29T09:09:00.000-07:00

Cotopaxi

Zrug uf em Festland bin ich direkt in die hoche Berge. Ich bi uf dr Vulkan Cotopaxi kletteret, nei nid bis ganz ufe. bis ca. 4000m, erisch glaeb 5800m hoch und Schneebedeckt. ich bi eifach bis zur Schneegraenze gwanderet und es isch mir scho bitz d pusti wegbliebe. Durab bin ich de mit em Mountenbike, das isch lustig gsi! Wit obe im Himmel haen mir de no en Komoran, dr groesti Vogel vo de Ande gseh sini Kreise z zieh.

Quilotoa Loop

Das isch en Kratersee und wo ich de in 5 Stunde umwanderet han,isch strahlend Wetter gsi und ich han en einmaligi ussicht gnosse. Es isch scho speziell das de so hoech bisch und alli Berge um dich ume si gruen mit Blueme in allne Farbe. Jo dur dr Tag sich d Sunne superstark und doch goht immer en chalte wind. In dr Nacht han ich de gfroohre, trotz 3 Wulldeckene, brrr... Und die Iheimische Indianerfraue laufe eifach ime Rock mit Socke ume und hei nid chalt!
Ich due mich jetzt do in Baños in de warme Thermalbaeder ufwaerme!

Galapagos

2009-05-19T11:06:00.000-07:00

Quito

D Hauptstadt vo Ecuador isch e Stadt wo mir mega guet gfalle het, ich ha de au fast e Wuche doert verbrocht. Stelled euch vor ich bin jetzt uf dr Suedhalbchugele, also alles chli verchehrti Welt :-)
Jup ich bi uf em equator gstande, ha au brav es tourri Foeteli gmacht, doch nochhher isch uf misterioesi art und wies mi Kamera verschwunde! Das heisst, kei Foeteli me uf em Internet. Dcoh wer Facebook het de gseht villicht de oepe die es foeteli vo me Mitreisende...

Galapagos

Ich saeg euch die Insle sind eifach en anderi Welt. Das me tier soo noech chan bestune und die eifach kei Angst vor eim hei isch einmalig. Vor allem han ich Seeleue, Schildchroet, Leguan, Fisch, Voegel ( mit blaue Fuess) und Haie gseh. taeglich en Schwumm im klare Wasser und en spaziergang uf ere andere Insle. vo dr Pflanzewaelt hei mir vor allem die riesige Kaktus gfalle. Uf unsem Schiff sind mir mit sensationellem Aesse verwoehnt worde und im allgemeine han ich en gueti Gruppe breicht. 7 Italiener, e Spanier und de ein vo Israel, Australie und ich "la nañia".
Mama mia, tuto bene :-)
Bim schnorchle han ich choene mit Seeleue und Haie, schwimme. I ha me respekt gha vor de Seeleue, will die hei mit eim woelle spiele und doch het me nie gwuesst wie wit si goi oder oeb ploetzlich s Alfa-Maenndli uftaucht. D Haie si meistens vil tiefer unde gschwumme und hei sich ueberhaupt nid fuer eim interessiert.

Ecuador...

2009-05-06T07:39:00.000-07:00

Mi letschti Stopp in Kolumbie, isch San Augustin gsi. Es isch zimmli verregnet gsi und die archaeologische Statue vo de Urihwoner hei mi nid so choene fasziniere!
So bin ich de schneller als plant witerzoge. Das isch de mi ni schlimmsti Busfahrt worde bis jetzt. Stelled euch en Chieswaeg in de Alpe vor, vom Raege usgwaesche mit riese Loecher, so en Weg wo nume dr Senn erlaubnis het zum befahre mit sim Toyota. Ok, so en Weg bin ich 6 Stund lang mit durchschnittlich 20km/h dehi gholperet. Jo do heschs gfuehl das de nie me achunsch! Me cha nid laese und schlofe scho gar nid, so gege aendi hesch de no ae volli Blose! acho und de grad in noechsti Bus, pure Luxus! Mit Beistuetzi und eme WC...

Nach ECUADOR!

Do fahrsch mit em Bus dur d Ande und bisch eifach fasziniert vo dr Natur!
Acho bin ich in Otovalo, das isch bekannt fuer si Maert. Ich han nid choene wiederstoh und han mir ein schoene, farbige, gstrickte Pulli kauft. Fuer sagehafti 9 Doller. Ich bi au dur dr Fleischmaert gloffe, hmm das isch wie biologieunterricht! Es het ganzi Daerm, Laebere, Lunge und Schweinschoepf. Do han ich mi Mage scho chli muese beherrsche.Vor allem isch mir de dr appetit vergange wo si direkt naeb em grupfte Huehn, Schoggifruecht a bote hei!
Uf mim Spaziergang bin ich zu me Fluss und Bergsee cho. Das isch scho no speziell do isch doch ein mit em Auto zum Fluss gfahre um doert d Woesch z waesche! Es Auti het me, aber kei Woeschmaschine. Am ganze Seeufer sind si flissig am waesche gsi und d Chinder am bade.

Kolumbie, Kolumbie....

2009-04-27T14:06:00.000-07:00

Tripp zur Ciudad Perdida
( Verlohreni Stadt)

Mit voller Energie han ich mi mit 7 Reisende uf d "Suechi" nach dere Stadt gmacht. Si litt in de Berge vo Kolumbie versteckt. Dr Weg fuehrt ueber Stock und Stei, wie durch Fluess und chlaeter Partie. Am dritte Tag si mir de unde an ere laaange Staege acho, 1200 Stufe sind z ueberwinde bis me in dr verlohrene Stadt achunt. usser Atem hei mir de au das letschte Hinderniss ueberwunde und si gluecklich obe a cho. Mir hei ame nid schlecht gstunt wie lichtfuessig di indianisch Bevoelkerig dur die Weg ghuscht si. Villicht litt ihres Gheimnis do drin, das si dr lieb lang Tag Kokablaetter duend chaue! Das git nach ihrer Tratition Chraft. Uf eme verschlungene WEg het uns en Kokainbuur zeigt wie me us dene Blaetter cha Kokain gewuenne. Isch nid ganz legal, doch er laebt vil besser vom Tourismus als vom Kokainverchauf, das isch doch scho mol oepis.
Erholt hei mir uns bim Bade im chuehle Fluss, eifach herrlich und in dr Nacht hei mir in Haengematte gschlofe. Mir hei meistens ca. 10 Stund schlof gha, wil so ohni elektrizitaet chasch nuem vil sinnvolls mache usser go schlofe... wie abhaengig mir au sind vom Strom!
Es paar wilde Tier bin ich de au no begegnet, ae giftigi riese Spinne, es Skorpion und zu mim Schrecke ae Schlange direkt vor mine Fuess. Ich han mich ganz langsam zrug zoge und de en riese Satz gno und si isch naetterwies ganz ruehig ligge bliebe.

Mued und gluecklich bin ich de wieder zrug in d Zivilisation und mich am Strand vom Tayrona Park go erhole. Es isch wunderschoen doerte, tuerkises Wasser und wisse Strand.

De bin ich witer zoge ins Landesinnere. Dr Bus isch irgendwie ueberfohrderet gsi mit dere lange Strecki und het beschlosse afo z brenne! So hei mir fluchtartig dr Bus verloh! S Schicksal het de woelle s Fuer loesche, es isch de naemmli in stroeme cho regne. Dr Fuerloescher het total verseit. So sind mir de noch eme Gwaltsame befreiigsakt vo eusem Gepaeck, im Raege gstande und hei zue gluegt wie euse Bus usbrennt. Naetterwies het eus de dr noechsti Bus asyl geh und mir hei unsi Reis choene fortsetze. In Villa de Leyva, eme vertraemte Kolonialstaedtli han ich es chlises Velotuerli gmacht und bi de witer nach Bogota.

Bogota

Do in dr Hauptstadt bin ich im e mega lessige Hostel und ha sit langem wieder mol es Museum bsuecht :-)
Kolumbie isch einzigartig, d Mensche so offe und liebenswert und au d infrastruktur wo si hei isch eini vo de beste wo ich bis jetzt uf miner Reis a troffe han. Leider isch es eifach so das es Menschelaebe do nid so vil Wert het und das Militaer, Polizei und was es suscht no so git nid umbedingt zaemme schaffe! Gseh duen ich das eigentli nid, doch wenn de mit Kolumbianer schwaezisch erfahrsch das recht schnell.

Soo, bis zum noechste mol....

Kolumbien II

Vo Panama nach Kolumbie

2009-04-12T16:28:00.000-07:00

Panama City

Grad am erste Tag si mir, d Katharina und i go dr Panama - Kanal go besichtige. Irgendwie gseht er recht chli us und doch choeme riesigi Schiff dure. Lustig isch so es grosses Chruezfahrtschiff gsi, mit allne Oemis und Oepis druf wo uns herzlich zuegwunke hei. Zum baue vom Kanal hei si en Zuglinie baut und do ich als Zugfahrerin, s reise im Zug sooo vermisse hei mir di eistuendigi Zugfahrt vo Panama nach Colon umbedingt woelle mache. Hmmm, jetzt isch es so das mir doch scho chli s Latinamerikanische Zitgfuehl a gnoh hei und so hei mir em Zug grad no choene winke. Dae isch naemmli puenktli wie es schwiezer Uehrli am 7.15 h abgfahre. Bim zwoite Versuech hets de klappt und mir hei d Fahrt dem schoene Kanal entlang mit Dschungeliblick in volle zueg gnosse.

Segeltour

Voller Vorfreud und eme chrible im Buch han ich in Miramar bekanntschaft gmacht mit em Kaeptem und sim Schiffli und mine 7 Mitreisenede. Mit eim Tag verspoetig, us Ichauftechnische Gruend vo Laebensmittel, si mir de in Seegstoche. Uesch, do het doch mi Mage rebelliert! gli han ich de technick dus gha das ich, wenn ich wahrend dr fahrt schlof, vil weniger Problem han. Nach unendliche 4h si mir de in dr Karibik bi ere Trauminsle a cho und schnell si d strapaze vo dr fahrt vergaesse gsi. Bim schnorchle het d Kollegin de au en chline Hai gseh, das git eim de doch chli es mulmigs Gfuehl und doch bin ich meistens zwei mol am Tag go schwimme. Es isch eifach herrlich i dem tuerkise Wasser...
Ei mol hei mirs au mit fische probiert, doch trotz grossem Isatz hei mir nur 2 Fisch gfange. Dr Best isch gsi das de eine sich wieder ind Freiheit grettet het. Nei bi mir isch keine an dr Angle ghange.
Mini idruecklichste Bilder si unvergaesslichi Sunneuntergaeng, en Bsuech in eme Indio - Dorf, wo si uns begafft hei und mir si, isch mir es bitz schreg ine cho und ae Gruppe vo Delfin wo mit eusem Boot es Wettrenne gmacht het.

Glucklich in Kolumbie

Jetzt bin ich wieder uf Festland und nach es paar ruehige Tag in dr antike Stadt Kolumbie fuehl ich mi wieder top fit. Ueber Ostere gits do super fester und d Stimmig isch so froehlich und eimalig bunt. Huet han ich ime chline Vulkan es Schlammbad mit Massage gno und han mich richtig verwoehne lo.
Jetzt fuehl ich mich wie neu und gang in ere wuechige Wanderig go di verlohreni Stadt entdecke.
Kuessli Ursi

Ps. Ich han sogar Eierduetsche gmacht an Ostere :-) Mit em Sam eme andere Schwiezer, er isch dr Ex-Schlagzueger vo QL. Aber fehle duet mir wuerkli dr Schoggiosterhaas, sniff....

Kolumbien / Segeln

Verschidenes

2009-03-25T09:46:00.000-07:00

Coca Cola

Wuessed ir woher de Name chunt? Das chunt vo dr urspruengliche Rezeptur, vo Coca = Kokain und Cola = Kolanuss, das het mi doch bitz ueberrascht! Ich gniesse do aber unter dr heisse Sunne d Vorteile vom Goggi (Huet zum Glueck ohni Kokain). So richtig chalt isch es en super Energiespaender!

Di weniger schoene Site

Was do scho tragisch isch, das es glaeb keis Tierschutzgsetz git. Es het unmenge vo Huend wo anere Chetti laebe, vo 1-2 m laengi. Oder Voegel in winzige Chefige, das duet mir de scho im Herze weh. Vor allem au wils so verbreitet isch!
Oder au d Sach mit em Abfall, am schlimmste isch es scho in Honduras gsi, doch au do in Panama lit unmenge uf dr Stross. Recycling isch do es Fremdwort! So lueg ich eifach damit ich mi Abfall schoen due entsorge, doch so ohni Abfallchuebel isch das ame mega schwierig!
Grad in Honduras laebe au vil eifach vom Abfall und we me dae de eifach wuerd besitige, was moeche die Luet de? Verhungere oder afo stehle? Das isch jo de au nid besser. Isch eifach mega schwierig.

Jetzt grad bin ich jo in Panama City und mir schlofe ime Hostel, hmm mi Rugge, cha do Gschichtli verzelle. D Better si meistens eifach Latteroest mit eme superduenne, durchlaegene Maetteli druf! Wenn mir de mol ime richtig Bett schlofe, gniess ich das richtig :-)

Duschene

Das isch so es anders Thema... Normalerwies duen ich mit chalt Wasser dusche, meistens au wenn si an dr Reception saege mir hei warm Wasser, chunt de us dr Brausi doch meistens eher chalt. Wenns warm isch spielt das au nid so e rolle, doch so i de Berge ueberleisch dr de scho oep dir das wilsch a tue. Wie so s Wasser uf di abebrasslet isch ame au chli froglich, oftmals bin ich froh wenn gnue chunt damit de d Seifi au wieder waeg goht. Es git do s Model, 1 Strahl do wird me suber. Bim Model verhockti Brausi, isch es de doch scho schwieriger, bis dr Punkt gfunde hesch wo de am meiste Wassertroepfli abbechunsch. Doch bis jetzt bin ich immer suber worde!

Jetzt hoff ich das es mit em Zimmer im Hostel no klappt, wil si eigentli usbuecht sind und uns de use schmeisse! Bis jetzt hei mir aber immer oepis gfunde :-)

Gester si mir dr Panama Kanal go aluege, de hei si grad es riese Passagier-Chruezfahrtschiff dur d Schleuse lo und alli Oemis und Oepis hei eus gwunke. Das si de scho anderi Dimensione als ich vo euserer Frankrich - Boetlifahrt kenn. Und jetzt sind si au no ame zwoite baue fuer groesseri Schiff!

So und das ischs gsi...

Karibik und Panama

2009-03-16T10:46:00.000-07:00

Tortugero

Es chlises Oertli wo me nur mit em Schiffli hi chunt und de lit das im Regewald und het sim Name alli ehr gmacht. Trotz Regeschutz si mir zimmli nass a cho. Ok, mir hei kei einzigi Schildchrot gseh, doch drfuer ganz e huffe anderi exotischi Tier: Aeffli, Voegel in allne Farbe, Aligatore, Leguan und no anderi wo ich nid weiss wie si heisse... und wahnsinnig vil Chrtoete, mir hei gfunde de Ort soet eher Sapogero (Sapo= Kroete)heisse und nid Tortugero ( Schildkroete).
Uf dr Rueckreis het de doch no d Sunne gschine und de si d Krokodil am Flussufer am suennele gsi. Jo das isch de scho idruecklich, de hoffsch eifach das es kei Hunger het!

Siquieres

Doert hei mir en Schueler vom Gym Muttenz bsuecht und haend doerfe bi siner Gastfamilie wohne. Total eifach und super lieb! Di groesti Atraktion vo daem Ort isch es Krokodil und das si mir de natuerli au go aluege. So ime Gheg isch de das scho wieder vil weniger spektakulaer!

Puerto Viejo

So eis vo de letschte Ort in Costa Rica, es Surferparadies und zimmli Regenerisch! So hei mir nid so vil unternoh... Im botanisch Garte sind mir uf vili chlini roti Giftfroeschli gstosse und hei en chlini Sumpfwanderig gmacht.
Am noechste Tag sind mir mit em Velo an en schoene Strand gfahre und hei unterwegs es Fuultier mit eme Junge gseh, sooooo langsam :-)
Uf em Ruckweg han ich de en Ort entdeckt wo si Zoepfli mache und en gueti Stund spoeter bin ich mit Chraeleli in de Hoor zrug zum Hostel gradlet. Das het mi sagehafti Fr. 20.-- kostet. Do stunt me scho immmer wieder, wie guenstig das es isch!
Obwohl so nach Honduras isch Costa Rica meega tuer!!

PANAMA

Ueber en abentuerlich Brug sind mir mit eusne schwere Rucksaeck in Panama acho. Vo doert us si mir zu de Insle Boca de torro, d Sunne het wieder gschune und s Fest isch losgange! Das isch ei Partystadt und schnell hesch neui Luet kenneglehrt...
Unteranderem dr Peter im Schwizer T-Shirt, wo aber sit 15 Johr in de USA laebt. Ganz e lustige, er isch de au zmitzt in dr Nacht mit dr Kati is Meer gumpt. Ich ha eigentli nid so lust gha und alli hei gfunde gang doch. De isch so en Gringo cho und het gfunde er zahl mir 50 Doller wenn ich dri gump. Mi erst Gedanke isch gsi, NEI!!! Bi doch nid chaeuflich und de het er so lang uf mi i gschwaetzt und das ich gfunde han es passiert mir jo nuet. Chleider abzieh und in dr Unterwoesch en Sprung is chuele nass, was fuer ae Erfrueschig :-) und scho bi ni 50 Doller richer gsi!!!

Dschungel

De hei mir e Nacht im nirgendwo uebernachtet und sind vo Obe bis unde verstoche worde, totz Antibrumm. Mis Moskito - Netz traeg ich jetzt au nuem mit, wil mes eh nie cha ufhaenke! Doch bi me Lagerfuer hei de alli chli vo ihrne Reise verzellt und de isch me scho gmuetlich is Bett. Ae ganz anderi Welt!

David

Eifach en Stadt, nuet bsunders...
Doch Panama gfallt mir vil, vil besser als Costa Rica! D Luet sind fruendlicher und hilfsbereiter, s Klima isch nid so nass und es isch richtig haerzig, wie do d Luet no in richtig traditioneller Chleidig ume laufe.

Panama

Costa Rica

2009-03-02T10:46:00.000-08:00

Im Tico - Land

Costa Rica

Tico, so nenne sich d Luet vo Costa Rica. Ich bi noch ere endlose Busfahrt in San Jose a cho, mit dr Katharina. An dr Busstation het d Victoria mit ihrer Mueter scho uf uns gwartet. D Victoria isch do vo Costa Rica und het es halbs Johr bi mine Eltere glaebt. Mir hei de s Wuchenend mit ihne verbrocht und hei so chli d Region um San Jose erkundet. Es isch vor allem en chreftige Wind gange. Mini erste Idrueck sind so gsi, das me gseht das si do eifach meh Geld hei. Es isch vil sueberer und organisierter als in Honduras.

De hei mir eus Ufgmacht zum Strand. Es isch richtig warm gsi, so das mir fast nid hei choene schlofe. Am morge sind mir superfrueh ufgstande und hei woelle dr Sunneufgang go a luege. Z erst isch no voll Nacht gsi und de isch es so langsam hell worde. Dr Himmel isch voll bewoelkt gsi und mir hei scho denkt mir werde dr Sunneufgang drum nid gseh. So si mir zrug zum Hotel glofe und denn isch si grad ufgange. Ay, soooo schoen!!!

Unse noechste Stopp isch i de Berge gsi, en Nebelwald. Uf em Weg doerthi hei mir en Regeboge gseh, ohni Rege. Doert obe isch d Luftfuechtigkeit so hoch das es mit dr Sunne en riesige Raegeboge git. Eifach faszinierend! Am noechste morge, si mir de im Rege go dr Bergnebelwald durchlaufe, es isch zwar chli chalt gsi und me het vil weniger Tier gseh dur dr Raege, doch d Natur isch eifach einmlig! So beidruckend wie halt alli Baeumstaemm gruen bewachse si dur die hohi Luftfuechtigkeit. Es gseht halt total anders us, Farn wo so gross sind wie Baeum und so witer.
Z Nacht si mi de no di Costaricanische Froesch go a luege und hei dr grossi Steifrosch kuesst, doch en Prinz isch keine fuehre cho ;-)

Im Bus nach San Jose, han ich de festgstellt das uns es paar duend beobachte und so zeiche mache unterenand. Ich han de d Katharina gweckt und mir hei alles unses Zuegs verstaut und uns uf e Diebstahl vorbereitet. De si, si usgstige und mir si extra sitzte bliibe und de hei mir nochher ghoert das si anderi Tourist ueberfalle hei. Glueck fuer uns, es duet mir leid fuer di andere. Ich ha es halbs Johr im gfoehrliche Honduras glaebt und bi im unsichere Guatmala gsi und nie isch mir so oepis passiert. Chum bin ich im kultivierte Costa Rica erlaeb ich das!
So hoff ich doch das ich witerhin so ufmerksam bi...

Jetzt goi mir de witer zu me Ort mit Schildchrote und an en andere Strand.
Mir sis am gniesse!

Date

2009-02-18T16:08:00.001-08:00

So mini liebe huet han ich es paar Date fuer euch. Morn am 19. Februar wird ich Honduras verloh und mit em Bus nach Costa Rica fahre. Am 21. wird eus, d Katharina und i, d Victoria in San Jose in Empfang neh. Denn duend mir Costa Rica unsicher mache.

Ganz oepis anders, wo fuer mi no wit, wit weg isch: mini Ruckreis! Am 15. August wird es Flugi mit mir drin am Flughafe Zueri lande. Dr Flugplan seit das mir 11.05 h achoeme. Hoffe mir doch das alles guet klappt und ich gsund und munter darf us dem Flugi stige.

Ich ha mi scho vo einige verabschieded und ha jetzt no es feins Aesse mit dr Familie und de mach ich no es letschts mol Party do in Honduras!!
Danke das ich das darf erlaebe und s mir so guet goht!
Ich wird euch uf em laufende halte...

Despedida Honduras

Dr heissi Suede vo Honduras

2009-02-11T09:58:00.000-08:00

Amapala

Zum Schluss han ichs doch au no an d Pazifiküste gschafft. Me seit das dr Suede vo Honduras so heiss isch wie es brennends Füür und das stimmt! Es isch troche und d Sunne präglet nume so vom Himmel. Dr Marie, ä dütschi Volonteer und mis Ziel isch d Insle Amapala gsi. Doert si mir de au acho nach ere schneggefahrt im Bus, Sandwich im Taxi und ere erfrueschende fahrt ueber s Meer im Boetli. Noch dem das mir de euses Hotel gfunde hei, isch nur no eis in frog cho: ab in Bikini und is Meer. Das isch en schoeni Erfrueschig gsi.
En Iheimische wo mir am Strand atroffe hei het eus gseit das es gamz i dr noechi en Strand mit blauem Sand git. Do si mir natuerli gwundrig worde und si en eus go aluege. Zerst hei mir denkt, de Seich de isch jo schwarz, doch wenn me gnau hi gluegt het, het me gseh das er metallisch blau schimmeret. De isch d Sunne untergange und es het en bezauberndi obigrot Stimmig gherrscht, es isch eifach so chli zum traeume gsi...
Bim Hotel hei de d Kokosnuess vo de Palme d Marie a glacht und dr Sohn isch se de extra fuer eus vom Baum go pfluecke und mir hei de ae fruesche Kokossaft trunke. Nei erfrueschend isch es nid gsi, will d Kokosnuess jo dr ganz Tag in dr prallende Sunne gsi sind, isch s Kokoswasser zimmli leih warm gsi.Fuer mi isch eifach s Erlaebnis eimalig gsi. Am Obe hend mir eus de fruesch gfischte Fisch lo schmoecke. Richtig lecker! Zum Glueck isst me do vo Hand und de isch das kei Problem, doch ich haett kei Ahnig wie mit Fischbsteck umzgo.

In Amapala isch es zu dere Johreszit zimmli usgstorbe und i glaub mir si fast die einzige Touriste gsi. Doch do mir am Samstig ae riese Party gha hei, isch uns die rueh grad glaege cho zum relaxe. En gmuetliche Strandspaziergang het de dr Obe beendet.

Dr noechsti Morge hei mir mit eme schwumm im Meer agfange und si de go d Insle entdecke. Mir hei mega lust uf Fruecht gha und das het me am Strand nid becho. De isch es Meitli so lieb gsi und isch mit eus dr Huegel ufe gloffe und het eus zeigt wo mir eusi Fruecht choene chaufe. So lieb! Uf unserem Spaziergang hei mir no en ca. 50 cm grosse Leguan gseh, doch wo er eus entdeckt het, isch er natuerli grad abduest.
Amapala isch en Vulkaninsle, wo aber nuem aktiv isch, doch dr Huegel cha me natuerli bestige und so hei mir eus am Nomi in bruetender Hitz und fast ohni Wasser uf dr Weg gmacht. Nach 1 1/2 duruf chraxle, si mir zwei roti Tomate gsi, hei scho es paar schoeni Ussichte gnosse und haend kei blasse schimmer gha wie wit das es no isch. So hei mir nach dr Vernunft entschide und si umkehrt das mir no bi Tagesliecht zrug choeme. De hei mir eifach no dr Obe gnosse und jedes erfrueschende Windli.

De isch scho wieder d Ruckreis a gseit gsi. Am chline Hafe hei mir de uf anderi Luet gwartet wo au ans Festland hei woelle, wil sust keis Boetli fahrt. Nach 2 Stund het de zum Glueck eine mit Boot uebere woelle und mir hei doerfe mitfahre. Bim erste Bus hei mir de meh Glueck gha, wil de grad abgfahre isch wo mir igstige sind. Noechsti Etappe, warte in dr bruetende Suedhitz uf das en Bus chunt, nid grad agnehm. Do eh fast alli ghupt hei wo a eus zwei Schoenheite verbigfahre sind, han ich de spontan eme Lasti gwunke und de het de au prompt aghalte und uns mitgnoh. Es isch vil bequemer gsi uf sim Bett z ligge, als ime stickige Bus iklemmt z hocke und de hei mir erst no Verpflegig spendiert becho. Er het ei Stolz gha das er unterhaltig gha het vo ere Duetsche und ere Schwizere, i has gmuetli gfunde. Do er voll belade gsi isch, si mir eifach eher gmuetlich vor eus hi tuckerlet, wil dr Motor nid meh moege het, doch das hei mir in chauf gnoh.
So bin ich mit eme lichte Sunnebrand, es paar Erfahrige riecher und gluecklich wieder hei cho.

Honduras isch eifach wunderschoen!

Amapala

gli chunt dr Abschied!

2009-01-26T17:58:00.000-08:00

Sproche...

Mit schrecke han ich muesse feststelle das mis Franzoesisch vollstaendig verschwunde isch! Ich verstand zwar was dr Franzos en neue Ustuscher seit, doch ich cha ihm nume uf spanisch antwort geh. Wenn ich mit dr Katharina Duetsch schwaetz, schlieche sich au immer spanischi Woerter i, oops. So muest doch also mis spanisch nid schlecht cho, ich verstande vil und cha das wo ich moecht saege au usdrucke, doch i ha eifach kei ahnig obs gramatikalisch richtig isch. De isch mis Schwiezer ch zimmli stark und do duet me das nid soooo stark betone. Englisch hei mir jo de au no, ich glaub mi Wortschatz isch bitz groesser worde, doch sust bin ich immer no uf eme glich schlechte Level.
Also sgit no vil zum lehre und irgendwie han ich jetzt au no lust becho italienisch z lehre, mol luege....

De ha ni mir do no es paar honduranischi Gwohnheite zuegleit. Do isch das normal, doch bi eus macht me das nid. Also hend chli verstaendnis mit mir wenn ich zrug chum. Do duet me sehr vil vo Hand esse und ich muess saege, ich weiss scho bad nuem wie es Messer usgset. oepis anders isch, jede duet do immer chli vor sich hi singe und mit dr Zit han ich das au a gfange. Ploetzlich sing ich ame und es fallt mir gar nid uf das ichs mach. De gits es honduren Face, das isch we me in en richtig zeigt, macht me das nid mit de Haend, sondern mit em Muul. Wenn das alli um di ume moeche, uebernimmsch das irgend wenn. De hoff ich doch s best das im noechste halbe Johr, sich das wieder chli leit.

Adios Honduras

Das isch jetzt mini letschti Wuche wo ich schaff und de am 19. Februar verloh ich Honduras und gang nach Costa Rica. Ich bi scho bitz truurig, denn ich ha do mega liebi Luet kenneglehrt. Bi einige weiss ich au das ich se wahrschiendli nie meh wird gseh und do si i mim Projekt au kei Internet benutze,isch es schwierig Kontakt z bahalte. Doch ich bi natuerli mega gspannt was no so alles uf mi zue chunt:-)

Was han ich so gmacht

Bi vor allem chli am feste, fiire und gniesse. Mir hei do in Tegus grad em Fuessballcup vo Centralamerika und ich bi mit mim Projekt dr Match Honduras - Belize go luege. Jupii, mir hei 2:1 gwunne. E Mueter us mim Projekt het ebe 10 Bilet gwunne und so han ich doerfe mitgo. Isch mega lustig gsi mit ihne. Do si normalerwies fast nie furtgoi, sind si voller Energie mit schreie und klatsche derbi gsi. Es het se fast meh interessiert wo jetzt grad d Welle im Stadion isch, als was uf em Fuessballfeld gloffe isch.

Denn han ich de Fraue en Massagekurs geh, isch astrengend und spannend gsi. Ihri finmotorische Faehigkeite si eher schlecht, de han ich mir gseit: Hauptsach si hei en Idee und naehme sich mol Zit fuer en Massage unterenand. Zur Motivation bechoeme jetzt alli es Diplom das si de Kurs gmacht hei!

Do hets no es paar Schnappschuess:

schnappschues

Puerto Cortes

2009-01-12T17:50:00.000-08:00

3 Daeg han ich gschafft und de hets mi scho wieder an Strand zoge.
In San Pedro si mir zerst an es Polatsche konzert, das isch super gsi. Das isch en Honduraner wo in Calitsche singt, s honduranische Strosse Spanisch und es isch so rockigi Musig kombiniert mit Bongos und Gige. Eifach einmalig!

De si mir fuers Wuchenend as Meer, hei Fisch gaesse und s gmuetlich gha. Am Sunntig si mir de nos Fort vo Omoa go aluege. Das isch s groeste, aber au s juengste vo Centralamerika. Fruehner isch das natuerli grad an dr Kueste gsi und Huet isch es guet 100m drvo entfernt. Do merkte das sich d Welt immer bitz veraenderte...

San Pedro / Puerto Cortes

Karibik

2009-01-06T18:50:00.001-08:00

Strand vo Honduras

Dr 2ti Teil vo miner Reis

26. Dezaember

En endlosi Busfahrt nach Trujllo! Wo mir vo Chopf bis Fuess igstaubt a cho sind, hei mir nur no ei Wunsch gha: Bikini montiere und ab ins Meer! Ei isch das en Erfrueschig gsi:-)

27. Dezaember

In Trujllo isch dr Columbus z allererst gstrandet, doch usser eme chline Fort und ere Columbus Statue erinneret nid vil a ihn. Am Nomittag sind mir mit eme Boot ufs Meer usebraust und sind chli go schnorchle, do mir 6 Fraue uns schnell mit em Kaepten und sim Kumpan agfruendet hei, haend mir de no in es Gariffuna Dorf, das sind die schwarze Iwohner vo dr honduranische Kueste, choene go z Mittag esse. De isch dr Rege cho und mir si total durchnaesst zrug uebers Meer braust und hei eifach schnell is Hotel unter d Duschi woelle. So het eus euses Boetli bis an Strand vo eusem Hotel brocht, richtig nobel:-)
Am Obe si mir de in Usgang und dr Gifity probiert, dr Schnaps vo de Garifunas. Es isch Rum mit Chrueter drin, doch es het mir gschmoeckt.

28. Dezaember

Ab nach Ceiba, aen groesseri Stadt an dr Kueste. D Sandra, ae Schwedin, wird doert in de Berge ime Projekt schaffe und so sind mir mit ihre eme wunderschoene Fluss entlang ufe ind d Berge und in Dschungel. D Natur beidruckt mich mit ihrer Schoenheit eifach immer wieder. Baeum in allne Forme und groesse und de dr Fluss mit kristallklarem Wasser und riesige Stei, eifach traumhaft! Natuerli hei mir es Bad gnoh und ab eme ca. 5 m hohe Stei het me choene is Wasser gumpe. Hei dir glaubets nid, doch ich has gmacht! Das het ueberwindig brucht und ich ha mi Adrenalinkick gha fuer es wieli. ( Bi di einzig gsi wos gwogt het!)

Zrug in Ceiba hei mir en feine fruesche Fisch gaesse und en Cocktail drzue gschluerft,mmm. Ich iss fang wuerkli alles, was mir nid so mundet isch Schnaeg und Tintefisch, das wird glaub au so bliebe.

29. Dezaember

Cayos Cochinos, Insle wie us em Bilderbuech! Wisse Strand, tuerkis Wasser, Palme was wil me meh? Villicht kei Rege? Also die erste Stunde si en Traum gsi und ich bi au go schnorchle und was ich doert gseh ha het mir dr Atem gnoh. Live ischs halt scho ganz anders, als ime Film oder im Zoo. Denn isch dr Rege cho und im Meer isch das easy gsi, doch we me us em Wasser isch hets eim richtig gfrohre, so nass mit em Wind. De hei mir nomel es paar Stunde Sunneschien doerfe gniesse und en Vorfuehrig vo Garifuna - Tanz, was die mache mit ihrne Hueft, isch mir es Raetsel. Denn sind mir im stroemende Raege ae halb Stund ime Boetli zrug zum Festland gfahre, ui das isch es nasses Abentuer gsi.

Trotzdem hei mi die Insle mega beidruckt!

UTILA!!! 30.Dezaember - 4. Januar

Mit dr Faehri si mir ae Stund uebers Meer gschaucklet und de si mir im Party - Paradies a cho. Zerst hei mir es chlises Problem gha, wil mir kei Hotel me gha hei. Doch denn hei mir es Huesli gmietet, das isch eifach s Best gsi wo eus het choene passiere. So sind mir zu 11 izoge und hei eus de natuerli grad ufgmacht zum Strand. Zum erste mol han ich en Seestaern gseh, es isch scho oepis schoens. Dr Sand het leider irgend welchi Floeh oder so gha und so hets eus vo obe bis und bisse und verstoche:-(
D Frederica, eusi Italienere het eus de zum Znacht mit eme Traum vo nere Pasta ueberrascht. Mmmm, es isch mir richtig guet gange. De si mir zrug is Meer und hei doert i dr Nacht, im Wasser Regeton tanzt. D Muusig isch grad vom Strandrestaurant cho und mir hei en super Stimmig gha. So hei mirs laebe zwuesche Strand, Party und Schnorchle gnosse! Am Silvester hei mir en Usflug zu ere chline Insle gmacht und si de im Sunneuntergang hei gfraesst, ei das isch en einmaligi stimmig gsi und en super usklang fuers alte Johr. S neue Johr han ich mit eme Drink und Spruehcherzli agfange und ha es riese Fest gha. D Bar wo mir gsi sind het ae Platform ufs Meer use und isch unter freiem Himmel gsi. Nur die roti Unterwoesch han ich nid i mim Gepaeck gha, drfuer han ich im Dschungel en Baum umarmt wo mir es Johr lang Glueck bringt.
So han ich ein einmaligi Zit erlaebt und ha fast nuem zrueg woelle go schaffe. I bi mir chli vorcho wie in ere andere Welt! D Faehri het sich dem agnoh und isch kaput gange, so das es gheisse het me cha nid zrug ufs Festland. Bis am Sunntig wo mir hei sind hets de es Ersatzschiff gha, das het eus de eifach in 3 Stund zrug brocht.
Do dr Carlos jetzt es Auti het, bin ich mit ihm hei gfahre und mir si no d Katharina in la Esperanza go bsueche. Do das zimmli wit isch hei mir eus d Strecki ufteilt und i bi wieder mol Auti gfahre, hei das het richtig spass gmacht.
In la Esperanza isch jetzt grad Erdbeeri Zit, hmm herrlich fruchtig und aromatisch sind die:-)

Jetzt bi ni wieder zrug und mach mi scho gli uf um Puerto Cortes go z entdecke...

Wiehnachte in Honduras

2008-12-26T01:02:00.000-08:00

Frohi Wiehnachte!

Ich han chli en chaotischi Wiehnachte erlaebt do und fuer mi isch es me irgend es Familietreffe gsi. Z erst si mir (Suyapa, Maggie und i) ind Chile. Es isch fuer mi s erst mol gsi das es mir gar nid gfalle het, es het naemli kei Musigband gha. Es isch eifach en alti Frau gsi wo Orgele gspielt het und us voller Kehle chruezfalsch gsunge het.
Den sind mir ins Huus vo dr Grossmueter, ohni Alejandro mi Gastvater. Er het mir scho mol gseit das Wiehnachte nuet fuer ihn sig und doch hets mich de sehr verwunderet das er gar nid mitcho isch.
Doert acho hets ae huffe Luet gha, di ganzi Familie Cassis. Me het chli gschwaezt, kocht und agfange trinke. Es isch chli zuegange wie ime Ameisehufe. Wos Aesse parat gsi isch het jede eifach grad doert gaesse wo er gsi isch und sobald er gha het. Es paar verusse im stoh, anderi hei sich doch es Plaetzli zum sitze gsuecht. Die einte hei agfange und anderi si scho fertig gsi. Zwoi si irgendwie nonstop am Natel ghange, do isch es ueberhaupt nid ufgfalle das ich mis Natel zmits im Aesse abgnoh han und veruse bi. Dr Carlos het de gmeint das sigi scho eher unueblich das es so chaotisch zueh und her goht. Doch das me sich an Wiehnachte eifach betrinkt, das isch normal.
Noch em Aesse isch me eifach umeghockt, es isch irgendwelchi Muusig gloffe. Je nach daem hei gwuessi bitz tanzt und um Mitternacht het me sich umarmt und gratuliert, wil sozaege dr Geburtsdag vo allne isch.
Gschaenkli hets de no vil spoeter geh, doch das isch do eher en Naebesach. Es het fast niemer Gschaenkli geh und die zwei Chinder wos gha het hei genau 1 Gschaenk vo ihrne Eltere becho. D Grossmueter het bitz Geld verteilt an ihri Enkel. Das han ich no positiv gfunde.
Doch fuer mi het das nuet mit Wiehnachte ztue gha, es het so vil gfehlt: Cherzli, Wiehnachtsliedli und so es zaemesi.
Am 25. bin ich wider ind d Chile und de han ich das bitz gha, amel viel Cherze und oepe zwei Wiehnachtslieder.
So jetzt isch dr Rucksack packt und ich gang ab ind Karibik :-)

Guatemala / Honduras

2008-12-23T10:06:00.000-08:00

Ferien 13.12 - 23.12

Noch mim Geburifest am Frittig han ich mich im Morgegraue ufgmacht nach Guatemala mit miner Vertraute Katharina :-)

Guatemala

Mir zwei clevere, si ohni ei Quetzal loszoge, d Waehrig vo Guatemala. So hei mir bitz Gaeld gwechslet und si voll bschisse worde! Doch umgrechnet han ich oepe Fr. 5.-- verlohre....
Noch ere endlose Busfahrt vo 12 Stund si mir in Guatemala City gsi, e riese Stadt! Eigentli hei mir eifach schnell in es Hotel woelle und gmuetlich uebernachte und am Morge witer nach Antigua. Mir si ins Taxi igstige und hei uns zu me Hostel bringe lo, ooops das isch voll gsi und die noechste 3 au! Si hei ebe grad a daem Wuchenend es Wiehnachtsfuehrwerk gha in dr Stadt und das wend natuerli alli gseh! Langsam het euse Mage knurrt und dr Taxi Chauffeur het sich um uns gsorgt und mir si ime Drive in oepis go aesse, ok ei sorg weniger...
Mir si sicher scho 2h i dem Taxi und wuesse das er mol en bekannte Fuessballer gsi isch und au scho in dr bekanntischte Mannschaft vo Honduras gspielt het. Mir hei ihm vo eusne Plaen verzellt das mir nach Antigua zu ere ollegin vo dr Katharina wei. De het er gmeint das s beste sig wenn er uns direkt nacgh Antigua fahrt dos in Guate keis Plaetzli fuer uns het. Dank dr Salome, d Kollegin in Amtigua, ihrer sponanitaet hei mir das de au gmacht. Gluecklich si mir de nach ca. 3 h us em Taxi usgstige. Do mir im Taxichauffer so sympatisch gsi sind und er au froh gsi isch das er uns sicher het choene bringe, het er uns en super faire Pris gmacht. Uf unserer ganze Reis hei mir de das Glueck mitgnoh, wenn Engel reisen.... :-)

Antigua isch es wunderschoens antiks Staedlti und voll vo Touriste und Sprochstudente. Me ghoert allso allos nume fast kei spanisch. Mir si mit dr Salome unterwegs gsi und si het uns super insider Tipps geh vo feinem aesse. So simer vo dr Crepe zum Brownie gschlaenderet und so het sich doch es speckroelleli meh agsetzt.

Im Morgegraue si mir ufgstande um uf dr aktivi Vulkan z goh. Ufe hei mir es Roessli gno, das isch doch gmuetlich gsi und denn si mir bis 2m zum Lavastrom ahne und hei richtig s Waermi gspuert. Es isch idruecklich gsi und mir hei en wunderschoeni ussicht uf drei witeri Vulkaen gnosse.

Denn sind mir witer zum lago Atitlan. Das isch en spezielli Region, es wimmlet vo Hippis und vo Luet wo ihri Laebenstraeum verwuerkliche. Am Ufer hets drum ueberall spezielli Hueser, vo me Schloessli bis zu kreatione wo usgsehnd wie Anthroposophe Hueser gseht me alles. Gras stoht zum Teil au grad uf dr Spiesscharte und in eim Ort verchaufe Iheimischi aelteri Fraue Spacecake uf dr Stross.
Mir hei ime wunderschoene Hotel uebernachtet und eifach chli relaxt. Am noechst Tag sind mir am Ufer noch gloffe, ame schoene Plaetzli hei mir e Pause gmacht und eigentli nid gross lust gha alles wieder zrug z laufe ums Boetli z neh is noechste Dorf. Do isch doch grad i dr noechi es Motorboetli losduest und ich schrei und wink: "Fahrt ihr nach San Pedro", das isch wortwoerlich was ich gseit han;-) Mir sind ebe mit ere Duetsche unterwegs gsi und so bin ich voll im Hochdeutsch gsi und die andere hei sich praechtig amuesiert ab mir. Doch s Boetli isch wuerkli cho! So sind mir mit glichaltrige im Motorboetli ueber dr See gflizt und de hei si eus in San Pedro zu ere supergmuetliche Bar brocht. Das isch eifach super gsi!

Heimweh nach Honduras

De hets uns scho wieder in eusi Heimat Honduras zoge, es isch wuerkli wie es heicho gsi. In Copan de Ruinas hei mir ime superschoene Hotel uebernachtet! Am noechste Tag han ich mich zu de Ruine vo Copan ufgmacht. Mit ere Reisefuehrerin han ich en Iblick in d Maya - Kultur becho. Es isch so spannend gsi, das ich jetzt gern meh drueber wuerd wuesse. Was die fuer es Wuesse gha hend, eifach unglaublich. Si hend en Kalennder und de hoert am 21. Dez. 2012 uf, drum wird jetzt natuerli vil spekuliert was denn isch. Ich ha scho ghoert das es villicht e verschiebig vo de Planete und Gestirn git. Mini Fuehrerin denkt das sich villicht das wiederholt wos Endi vo de Mayas beduetet het. Si hei kei aesse me gha und hend sich gegesitig bekaempft und es sind schlimmi Erchrankige uftaucht. Ps. d Fuehrig isch uf spanisch gsi!

Am Nomi hei mir vil ueber Kaffi glehrt, na ja als spezialist moecht ich mi jetzt nid benenne. Doch mir hei wie e Privatfuehrig gha wil mir die einzige zwei Touris gsi sind.

Am Obe sind mir denn mit eusne Reisefuehrer oepis go trinke, de vom Kaffi und dr Katharina ihre Maya-Fuehrer. Es isch au ganz lustig gsi, doch am Schluss sin mir se fast nuem los worde. De han ich no es Ruendli im Auto vom einte dreit. Doch er het mega schiss gha. Doch do alles Steistrosse sind chasch gar nid schneller als 20km/h fahre, doch er het mir di ganz Zit gseit: despasio mami! Was so vil heisst wie langsam Mami. Irgendeinisch han ich de gnue gha und bi eifach us em Auto usgstige!! Was er natuerli fuer mega gfoehrlich ghalte het, obwohl in i dem Staedli ischs also wuerkli voll ruhig. Am 2.ooh si mir de bi eusem Hotel a cho und shit, d Tuere isch abgschlosse gsi! Me cha nume bis am 12.00h zrug chehre. Nach langem chlopfe und Luete, isch de ae gueti Seel eus cho ufmache. En Iheimische het sich au scho fuer eus uf d Suechi gmacht noch eim wo en Schluessel het. Es isch sooo idruecklich wie hilfsbereit die Luet do sind und alli sorge sich um uns oeb mir echt sicher sind!

Am nochste Morge, hei mir de halt wieder s negative erlaebt. Mir si in Bus gsaesse wo eus witerbrocht het nach Santa Rosa und es isch no ca. e halb Stund gange bis zur Abfahrt. D Maenner wo usse dra gstande si hei uns a glotzt wie mir es Stueck fruesches Fleisch waere und das isch uns immer wieder passiert.

Santa Rosa de Copan

Nuet speziells, eifach schnell witer. A doch en feini Granita de cafe (Iiskaffi) hets geh,mmmm. Nach dene bin ich scho fast chli suechtig.

Gracias

Es superschoens Oertli in de Berge! Ahnecho si mir ime stehend ime ueberfuellte Chickenbus. Das sin die alte, gelbe Schuelbues us dr USA, wo si do no bruche. Es het ca. 80 Sitzplaetz und me bigt ca. 120 Persone ihne und do jetzt um d Wiehnachtszit alli zu ihrne Familie hei reise, isch er eifach voeller als voll gsi. So sind mir de 1 1/2h ueber en holprigi Stross tuckerlet.

Nebst Chilene, gits doert au no warmi Quellene. Mir hei doert es Bad gno, doch es isch zimmli sicher s erst und s letscht mol gsi. Ok, Bikinis benutzt me do glaub nid oder villicht drunter? Also es sind alli mit de Chleider im Wasser umegschiwaderet. Damits richtig gmuetlich isch nimmt me doch grad s Bier und e Packig Chips mit is Wasser und wenn me denn no e Hand frei het raucht me no eini. Also fuer uns isch es eifach dreckig gsi! Doch allne Honduraner wo mir das gseit hei, haend eus nid choene verstoh! Do isch mir doch s Sole uno lieber:-)

La Esperanza

Dr Abschluss vo eusere Reis isch in dr Heimat vo dr Katharina gsi. Aendli d Woesch waesche, es gmuetlichs Bett und ae haerzensgueti Familie.

Zrug in Tegus hei mir huet dr 24. Dezaember und ich bi gspanne wie Wiehnachte wird. Es isch eifach schwierig bi 15-25 Grad und Sunneschien in Wiehnachtsstimmig cho...

Uff, dir sit am Endi acho :-)

9. Dezaember

2008-12-11T17:44:00.000-08:00

Ich ha en geniale Geburi doerfe erlaebe do in Honduras, es grosses GRACIAS an alli wo an mi daenkt hei! In Honduras isch no dr 8ti Dezaember gsi, doch noch eusere Schwiezerzit und mine Mails han ich scho Geburi gha. D Maggie und i si am Chueche bache gsi und do het si spontan fuer mi gsunge in spanisch, englisch, taiwanesisch und ich has ihre grad no in schwiezerduetsch bibrocht. Am noechste morge bin ich vo miner Familie herzlich und vile,vile guete Wuensch empfange worde. Mit Getraenk und Chueche hei si mi de zur Tankstell brocht und mit mir uf dr bus gwartet. Denn han ich en normale Morge in dr Therapie verbrocht und uebere Mittag het d Reina und d Aditta alles fuer mis Festli am Nomi organisiert. Waehrend daem bin ich fein go aesse i miner casa, es het Poulet mit Riis und Salat geh. Si heige speziell fuer mi kocht,si sind sooo guet zu mir. Noch em Mittag bin ich go d Chinder ilade und de isch mini honduranisch Familie cho und mir hei alli zaemme en froehliche Geburi gfiiret mit Singe, Chueche und Pinata( es honduranischs Geburtsdagsspiel). Vor allem d Chinder sind begeisteret gsi vo de zwei chline Huend vo dr Suyapa. Zum Znacht si mir, d Familie und dr Carlos, go Znacht aesse. Plato tipico de Honduras, das han ich mir gwunsche. mmmmm, eifach meeeega fein!!! Im hintergrund isch Geburtsdagsmusig gloffe und s ambiente isch so richtig familier gsi. De si mir ab hei und doert het dr Maggie ihre Chueche uf eus gwartet, das isch en suesse abschluss gsi vo me unvergaessliche und herzliche Tag!

Geburi

Und scho isch Dezember...

2008-12-03T18:56:00.000-08:00

Es Wiehnachtet

Do in Honduras isch scho lang alles Wiehnachtlich gschmueckt und do si weder en Adventschranz, no Adventskalender kenne stellt mr do dr Wiehnachtsbaum scho sehr frueh uf. Und si sind an Wiehnachte au alli no schoen, do ich do kei einzige echte Tannebaum gseh han. D Maggie und ich hei 2 Oebe an unsem gha, es Rieseteil! Bis mir nume dr Baum zaemmegsetzt gha hei, si mir ko gsi. Es erinneret mi chli an es Ichaufszenter, doch er gfallt mir.

Wo ich mit dr Katharina bi go ichaufe, si mir beidi bitz truurig gsi das es dis Johr kei Adventskalender git fuer eus:( Doch denn hei mir spontan beschlosse das mir eus gegesitig eine mache und so freu ich mich jetzt jede morge wie es chlises Chind uf mis Paeckli!

D Katharina und ich heis au mit Wiehnachtsgutzli bache versuecht. Hmm, soell ich jetzt wuerkli verrohte was mir fuer Sorte hei woelle mache... ok es waere Zimtsterne, Brunsli und spekulatius gsi. Worde sinds Nusshuefeli, Schwarzli und Sables. Zu unserer Verteidigung, mir hei das ohni Wog, mit eme katostrophale Bachofe und ohni gmahlni Nuess (es git nur Mandelsplitter) gmacht.

Medie

Hmm, do in Honduras chunsch de schnell id Medie, so als Exot. Zerst es Foeteli in dr Zittig und jetzt het me mich scho zwei mol im Fernseh choene gseh. S erst mol isch an dr Halloween - Party gsi und do het er mi gfrogt oeb ich intresse heig an ere Eierduschi. Das agebot han ich denn dankend abglehnt. S zweite mol isch i mim Projekt gsi, do hei si en Bricht ueber s SOS Chinderdorf gmacht und als Volonteer si mir interessanti Opfer gsi. Doch ich ha keis vo beidem gseh, isch villicht es Glueck, glaub nid das ich mis spanische gestaggel moecht ghoere und gseh!

Wochenende

Am vergangene Sunntig sind do in Honduras wahle gsi. Speziell isch das ab em Frittig in de Laede kei Alkohol me darf verchauft werde und am Samstig isch tote Hose, kei Bar oder Discotek het off. Das isch damit d Luet nid bsoffe goi go abstimme. Tja, ich cha do nur saege, typisch Honduras!
Am Sunntig Obe hei mir de s Fondue gmacht, wo mi Gastvater us dr Schwiz mitbrocht het. Mmmm es isch mega fein gsi, chli improvisiert zwar und s Brot isch au nid de Hammer gsi. Doch mir hei en lustige Obe gha. Also mir hei in erae normale Pfanne uf ere Chochplatte s Fondue gmacht und mit normale Gable s Brot drin dunkt. Dummerwies han ich als ersti mis Brot verlohre und ha denn mit em Javier muesse abwaesche und das ganze isch au no mini Idee gsi! Dumm gloffe....

Bloseentzuendig?

Ich bi immer no uf Antibiotika, doch ich fuehl mich wieder voll fit. Am Mentig han ichs fertig brocht mir ame Rollstuehl dr chlini Zeche z verstuche und er luechtet jetzt in allne Farbe. Doch ich cha wieder einigermase normal laufe.
I bi trotzdem mega gluecklich do und find das mir d Zit nur so dervo lauft!

Mini Familie

Bi mega happy mit Ihne und si moeche so vil fuer mi .Wenn ich ame mit de andere Ustuscher schwaetz, gits es paar wo maengisch gern mit mir tusche wuerde. Obwohls eigentli di meiste guet hei, abgseh vo chlinere Problem.
Ich lieb mini Freiheit wo si mir gend, so guet das do in Tegus moeglich isch und doch zeige si mir au das si mich scho in ihres Herz gschlosse hei.
Zum Bispiel am Ziestig morge wo ich fast nid ha choene laufe weg em Zeche, han ich mi uf dr Weg gmacht zur Tankstell wo dr Bus mich abholt. De het doch mi Gastvater, dae gueti, scho im Auto uf mich gwartet zum mich z bringe. Uu, bin ich froh gsi, obwohls ueberhaupt nid wit isch. D Suyapa het mir de no es SMS gschribe, das ich mir soell sorg geh und das Gott mich beschuetzi. Dr Gott macht do in Honduras sowieso alles, si sind sehr glaeubig. Do hei mir halt zwei verschiedeni Meinige. Wenns Ihne guet goht, isch das weg em Gott und fuer mi gohts eim guet we me selber guet zu sich luegt! Do han ich doch scho ettlichi Diskusione gfuehrt....

Neus vo Honduras

2008-11-25T07:09:00.000-08:00

Ooops jetzt isch es doch scho es wili her das ich oepis gschribe han, sorry.
Do ich nid so fit bi grad, han ich huet Zit zum schriebe. Han mir glaeb wieder mol en Bloseentzuendig igfange. Doch mi Familie moecht uf sicher go das es nid Dengue-Fieber isch (ha aber gar kei Fieber!) und so bin ich huet morge zum Bluet und Urintest gange. S Ergaebnis chunt de huet Nomi.

Ergaenis: Bloseentzuendig und d Ursi isch uf Antibiotika :-(

Mini Erlaebnis

Parque la Tigra

Vor 2 Wuche han ich e Wanderig durch dr Parque la Tigra gmacht. Das isch en Nebelwald in dr noechi vo Tegus. Es isch es Naturreservat mit viele Tier und ere Idrueckliche Pflanzewelt. Vor allem sind mir, dr Carlos und ich, Spinnene begegnet, doch mir hei au no 2 Reptilie und dr grueni Tucan gseh. Mi hei vor allem die grosse, dicke, alte Baeum beidruckt. Die heisse Ceiba.
De si mir noch ca. 3 Stund laufe im Minedoerfli el Rosario a cho. Mir hei uf em Waeg no d Ruine vo alte Silbermine gseh. Doert hei mir es z Mittag - z Nacht g aesse und ich saeg euch, eifach herrlich! Die Tortillas sind ganz anders gsi und drzue hets Bohne und Ruehrei geh. Das isch so richtig typisch honduranischs Esse und es schmoeckt mir vorzueglich.
De isch es cho regne und mir hei es Naturschauspiel doerfe miterlaebe, das mir eifach im Rege stohbliebe sind. El Rosario isch es Doerfli hoch obe, am Endi vo me Tal. Zerst isch alles klar gsi und dur d Thermik und mit em Raege isch innert Minute dr Nebel vom Himmel abe gheit. Es isch alles so schnell gange, das mir das gar nid wuerkli hei choene fasse. Es isch eifach unglaublich gsi! Ich has sogar gfilmt, doch life isch es natuerli vil besser...

In dr Nacht hei mir uns uf d Suechi nach ere Bar gmacht, wo el bar heisst. Dur Zuefall hei mir die au gfunde, de es isch eifach es wiesses Huettli wo nuet agschriebe isch. Me het eus nume gseit das das dr einzig Ort isch wo me es Bier bechunt. Es isch mir vorcho wie es Jugendruemli, usser das es naebst de Junge vom dorf no es paar Touris gha het. Und dr Barbsitzer isch sicher selber en guete Chund und ghoert eher zu ere aeltere Generation. Ich bi di einzig wieblichi Person gsi und es het au dr Aschien gmacht, dass das nid ueblich isch das Fraue oepis goi go trinke doert.

Am noechste Tag hei mir eus de ufgmacht ins noechste Doerfli San Juancito. Es isch chli und haerzig mit Strosse wo me ere Steilawine gliche und Huesli wo mi fasziniert hei. De hei mir dr Bus nach Valle de Angeles gno und si mis Pojekt go bsueche und de im Staedtli oepis go trinke. De hei mir eus zrug uf e Weg nach Tegus gmacht und zur Freud vo miner Gastmueter bin ich mit in d Chile gange.

la Tigra

Fuessballmatch Honduras - Mexico

Am Mittwuch 19. November, isch dr grossi Match Honduras Mexico gsi. Dur Glueck und en liebe Kolleg wo fuer eus isch go astoh, obwohl er selber gar nid an Match cho isch, hei mir Bilett gha. also hei mir eus uf e Weg nach San Pedro Sula gmacht, ca. 5 Stund im Bus. Wo ich und dr Carlos acho sind, hei alli scho uf eus gwartet, Katharina, Johanna us Oestrich und dr Pupi (fascht Cousin vom Carlos). Mir si de direkt is Stadion. Eigentli haette mir Sitzplaetz gha, doch es het viel meh Luet gha als Sitzplaetz und schlussendlich hei mir en nid allzu schlechte Stohplatz uf dr Stege gha. S Spiel het me guet gseh, mir si halt eifach bitz verregnet worde, do s Dach nid so wiet fuehre cho isch. Trotz Raege isch e super Stimmig gsi und mir hei 1:0 gwunne. Honduras isch jetzt ae Rundi witer und scho noecher dra an dr Teilnahm vo dr WM in Suedafrika. Das si mir de in San Pedro go fiire. Dank daem das es doert kei Sperrstund git, hei mir duregfestet und si den direkt uf dr Bus nach Tela.
Aaah jo, uf em Weg zur Busstation, sind mir no vo dr Polizei aghalte worde. Dummerwies het dr Pupi gar kei Fahruswies im Moment und mir si 6 Persone gsi statt 5, das isch aber alles kei problem we me Papier het das me im Spital schafft und so hei mir ungstrofft choene witerfahre.

Tela

Mir hei guet gschlofe im Bus und zum Glueck bin ich verwache, wo dr Chauffeur gseit het das mir in Tela sind. sust wer er eifach witer gfahre mit eus nach la Ceiba. die andere hei naemlig alli tief und fest pfuuset. Es het grad in stroeme gregnet wo mir us em Bus usgstige sind und so si mir de is Hotel chli go witerschlofe. Usgrueht si mir de doch no zum Strand. Mir heis gruesch und dr Duft vom Meer gnosse, doch mit bade isch nuet gsi. Dr Johanna ihri Eltere sind au in Tela gsi und so si mir alli zaemme gmuetlich go Znacht esse.
I dr Nacht hets de mi und Katharina packt und mir si ins Meer go bade. Chalt isch es naemli uebrhaupt nid gsi und das es no bitz troepfelet het, het eus de au nuem gstoert. Es isch super erfueschend gsi!
Am Frittig sind mir denn es Gariffuna Dorf go bsueche. Das isch es Volk wo an dr Kueste vo Honduras laebt. Si sind dur en Schiffsbruch, zur Zit vor Sklaverei, doert gstrandet und hei ihri eigeni Sproch und sind schwarz. Ihri Spezialitaete si Kokosbrot und no vil meh mit Kokos oder Meerestier. Mir hei den in ere Lagune ae Kaiaktour gmacht. Hi, hi dr Carlos und ich hei es wili gha bis mirs dus gha hei, wie ruedere, damit mir nid staendig in de Baeum glandet sind. Doch dank daem hei mir au mol es Chrebsli gseh wo grad dr Mangrove ufekraxlet isch und mir heis lustig gha. D Natur do gfallt mir do scho irrsinnig, e so verwuecheret und ganz anders. De hei mir au no es chlises Kokodil gseh und Affe wo in de Baeum umghanglet si. Sogar es Jungs Aeffli hei mir doerfe gseh.
Dur dr Rege si d Strosse nur no Schlamm und uf em Ruckweg si mir de stecke blibe mit eusem Buessli. Doch die ufgstellte und hilfsbereite Gariffunas si grad cho z seckle und hei eus ghulfe. Das isch scho einmalig wie gluecklich und offe die Luet sind, eifach liebenswert.
De hei mirs chli gmuetlich gno, fuer dr Carlos zu gmuetlich. Er isch de naemli abgeisst, do mir Langwielig sige!! Katharina und ich si de nach San Pedro zrug und hei es fest gha mit em Pupi und em Noel, 2 Aerzt in speh.

Fuessball und Strand

Lago Yojoa

2008-11-09T18:58:00.001-08:00

Lago Yojoa

Das Wuchenend bin ich am Lago Yojoa gsi und es isch wuerkli en faszinierendi Gegend. Am Samstig sind Katharina und ich mit zwei Duetsche vom Weltwaerts-Programm am See in en Naturpark. Fuer Auge und Ohre es einmaligs Erlaebnis. Doch die cheibe Moskitos hei eus fast in Wahnsinn tribe! Dos jo in Honduras so vil graegnet het, hets ganze Ufer ueberschwemmt und ploetzlich isch unse Weg eifach im Wasser untergange. Doch denn hei mir en wunderschoeni langi Brug gfunde, wo mir vieles gseh hei. Voegel und Fischer, wie vieles meh. A eim Ort isch si vo me Baum igstuerzt gsi und me het ueber es schmals Brett choene drueber balanziere. Am Endi vo dr Brug isch dr Weg wieder unter Wasser gstande und do mir nid alles hei woelle zrug laufe, hei mir churzerhand d Schueh uszoge und sind durschs Wasser gwatet.
Am Sunntig si de d Kati und ich zu de Wasserfaell, uf em Weg hei mir 2 grossi Leguane gseh. Das isch idruecklich gsi, so in dr freie Natur. bi de Wasserfaell het me eus gseit das es Chinder heig, wo eim hinter d Wasserfaell fuehre und das muess dehr idruecklich si. Mir sind frueh dra gsi, do mir au scho wider an eusi Heimreis vo 4-5 Stund hei muesse daenke und es isch wit und breit keis Chind ume gsi wo eus haet woelle d Wasserfaell vo ere andere Perspektive zeige. So hei mir obe am Wasserfall es Bad gno und hei eus bitz enttuescht uf dr Heimweg gmacht. Doch im Doerfli hei mir de so guet gaesse, das mir uns wohlgsinnt wieder uf dr Heimweg gmacht hei.
Gsund und mued bin ich den do in Tegus acho.

Catracha

2008-11-07T14:12:00.000-08:00

Geburi Kati

Catracha, das beduetet so viel wie Honduranerin, es isch wie en Uebername. Ich find das mega lessig und ich fuehl mi doch jede Tag bitz meh wie eini. So benutz ich zum Bispiel kei Messer me zum aesse. Am Afang han ich mi immer chli gfrogt, wenn ich en Teller z Esse becho han und e Gable derzue, wie ich das jetzt astaendig choent verspiese. Doch unterdesse weiss ich das me do ganz gern vo Hand isst und das ueberhaupt nid unastendig isch. Oder e spanniere het mich gfrogt oeb ich vo do (Honduras) sig, das het mi doch gfreut, do mich sust alli als Uslaendere identifiziere.

Was moechtet ihr no wuesse, es isch so das fuer mi vieles zum Alltag worde isch und so vergiss ich das es fuer euch choent spannend si. drum schriebed mir doch es Mail.

Am Wuchenend hei mir dr Katharina ihre Geburi gfiiret und es isch es super Fest gsi wo mir in gueter Erinnerig wird blibe.

nos vemos

Aaa, no weg em Unwetter do in Honduras. Es isch uuu tragisch fuers Land, zum Glueck isch bi mir aber nuet schlimmers passiert. Es goht mir guet do.

Was gits neus?

2008-10-27T20:51:00.000-07:00

¡Hola!

Hipotherapie

Am Frittig han ich im Projekt mit em Ross und de Chinder gschafft. Isch ganz luschtig gsi. Vor allem will sich s Ross kei Schritt het wöle bewege wo ich elei druf ghockt bi.

Geburtstagspartys

Am Obe isch de ä grossi Fete mit verruckter Chleidig a gseit gsi. Do ich leider nid so vil luschtigs do han isch es eher schlicht usgfalle bi mir. Doch mir hei mega guet gfiiret, es isch dr Geburtsdag vo erä Volonteer gsi.

Am Samstig bin ich de zu emä ganz andere Geburtsdagsfest iglade gsi. D Halbschwöster vo miner Gastmueter isch 24i worde. Es isch sehr gmüetlich gsi mit feinem Ässe. Mega lessig han ich gfunde das so Mexikaner si cho Liedli singe.

Hüt halt ich mi churz:-)

La Esperanza

2008-10-21T18:54:00.000-07:00

La esperanza

Do in Honduras herscht grad Durräge und das füehrt halt leider zu Überschwemmige. D Strosse liede au sehr und stürze i oder es chöme Steilawine vo de Berge. Doch mir gohts guet und bi eusem Huus duets nur wenig ine Rägne.
Trotz däm Wätter bin ich das Wuchenend d Katharina in La Esperanza go bsueche. Das isch es Dorf, so zimmli in dr mitti vom Land. Es isch dört eher ruehig und gmüetlich und ich ha es lessigs Wuchenend verbrocht. Ok, d Strosse dört si mit em Räge eifach nur no ei Sumpf und do s höcher lit isch es richtig chalt dörte. Drum han ich mi bitz verchältet :-(
Was mir so unternoh hei: Mir si im Quellwasser go dusche, do si mir nochher richtig wach gsi, de han ich mini Höörli bim Coiffeur lo (Für Fr. 3.--!!) und am Obe hets no en feine Cocktail geh.

Am Mentig bin ich de mit dr Katharina in ihres Projekt vo Save the children. Isch intressant gsi zum gseh. Do hets eifach im nüt en Chindergarte und d Chinder chöme vo überall her dörthi. Die Hüttene si eifach so verstreut uf em Land.

Mis Projekt

D han ich no neui Föteli vo mim Projekt. Im momänt schaff ich elei in dr Therapie, do d Reina Therapeutin gmeint het das ich das au schaff und si ä Wuche Ferie macht. Isch mega cool das si so vertraue het, doch es isch asträngend.
Ich mach mit de Chinder üebige, damit ihri Glänk beweglich bliibe. Eigentli eifach Physiotherapie. Usser am Fritig do gang ich mit eusne Sportler mit in d Villa Olympica. Dört düend si Renne, Botscha spiele und Schwimme. Ich gang wenn möglich mit de Schwimmer mit und de dört eifach zur sicherheit und motivation näbeherschwimme.

Honduras-Jamaika

De hets no es paar Bilder vom Usgang wo Honduras gegä Jamaika gspielt het. Hei ich ha jetzt sogar es Honduas Fuessballliebli! Leider hei si verlohre....
Doch ich ha es nätts Komplimänt becho: "Hondurena de corazon" Honduranerin vo Härze

Jo so als Wissi isch me do halt scho voll d Attraktion und si finde eim super und hüsch au we me fast bis zur unkenntlichkeit in d Rägejagge igmummelet isch.
Ich wird jo vom Projektbüssli abgohlt und de Fahre mir z erst dur d Stadt und ich chum mir ame vor wie ime Gfängnistransport im Film. Do mich alli astarre! De chöme mir im Projekt a wo vonere hoche Muur mit Stacheldroht umgeh isch a. Dr Sicherheitsmaa mit dr Pistole am Gurt machts Tor uf und loht eus ihne. De warte scho die neugierige Blicke vo es paar Chinder....
Doch ich chan scho sehr guet läbe drmit.
No öpis am Rand für Gwundernase, dr Chrankepfleger vom Projekt het mir so öpis wie es Liebesmail gschribe, s dumme isch nur ich stand voll nid uf ihn!

Mis Wuchenend

2008-10-08T19:19:00.000-07:00

Usgang

Am Frittig Obe si mir Ustuscher zäme in Usgang, das isch würkli lustig gsi :-)

Wochenende

Am Samstig si mir, d Familie mit dr Halbschwöster Alejandra vo dr Suyapa nach Valle de Angeles wo ä Feria isch, die ganz Wuche. Es isch eigentlich eifach en chline Märt.

D Heifahrt im strömende Räge isch zimmli Abentürlich gsi. Dur das fuechtwarme Wätter si d Schiebe a gofe um däm gegä z stüre hei si vorne s Fänster ufgmacht und bis in Tegus ischs Auti mit fast 10cm Wasser gfüllt gsi!

De si mir an es Akkordeon Konzärt und chum si mir ihne gloffe het eine vo dr Zittig es Föteli vo uns gmacht. So bin ich jetzt scho in dr honduranische Zittig Tribune erschine! ( http://www.latribuna.hn/news/50/ARTICLE/45440/2008-10-08.html )Während em Konzärt bi ni de zwar fascht uf em Stuehl igschlofe. Aber anschienend muess er guet si do si Ihn vo Dütschland iglade hei, dr Herr Buchholz.

Noch em Konzert hei mir gmerkt das s Auti au no platte het! So isch Reifewächsel a gseit gsi. Das isch au guet gange. Es stönde sowieso überall Wachtmänner ume wo nid vil z tue hei und so chöme si sehr gärn cho hälfe. Nochher hei mir aber no s andere Auti wölle go hole und so han ich mi s erst mol i dr Nacht in honduranische Verchehr igfüegt. Es isch guet gange bis uf d Löcher in dr Stross, wo ich in dr Nacht nid gseh han...

Klar bin ich am Sunntig in dr Chile gsi. Zum euch en Idruck geh, es Video:

Von Chile

Am Sunntig si mir de s Huus vo dr Stieftocher, wo in dr Schwiz läbt go bsueche. Es lit ime Dörfli in dr Höchi, Ojojona. Es mega schöns Huus und ä mega verschwändlig das es nid bewohnt wird! Do d Suyapa lang gschwätzt het, hei d Maggie und ich eus für es Fotoshouting entschide :-) D Chleider hei mir im Chaste gfunde.

Nochher si mir im Restaurant Napoleon go ä Plato Tipico ässe, isch uu fein gsi und es richtigs lessigs ambiente. Also es het Bohnepüree, Chees, frittierti Chochbanane mit Tortillas geh, narüli au no Fleisch und Würstli. Zur Vorspies hei mir es Pupusas gässe, das isch es gfüllts Maistortilla mit Chees.

Chatze

Ich ha dörfe es Chätzli taufe und do han ich ihm dä typisch schwiezer Chatzename Schnurli geh :-) Aber es het scho wieder neui Jungi geh....

Mi Arbetsplatz

2008-09-29T21:00:00.000-07:00

Mis Projekt

Tada, do han ich euch di erste Bilder vo miner Arbet. Bi witerhin mega glücklich dört.

Euse Sportler isch schnell im Renne und darf jetzt denn an Behinderte Wettkaämpf in Costa Rica.

Z letscht si no Föteli vo erä anderä Arbet vo mir: Chleider wäsche vo Hand. Mir hei scho ä Wäschmaschine doch es wird suberer vo Hand do d Maschine nur halbpatzig funktioniert.

Vercher

Do ich jedä Tag mit em Büsli 2 Stund im Honduranisch Vercher unterwägs bi, han ich dänkt ich wött euch chli vo däm Chaos schriebe. Fönge mir doch bi de Strosse a, usserhalb vo Tegus si nume die wichtigste Strosse teeret und die andere sind so Chis und Steiwäg. Das rumplet ame zimmli und jetzt i dr Rägezit verwandle si sich gärn zu erä Match - Pampa, gwüssi näme au so Flussähndlichi forme a. Meinet jetzt aber nid, dass die teerete Strosse besser sind, die händ ame zimli grossi Schlaglöcher, villicht wie en Doledeckel oder bitz grösser. wes keini Löcher i dr Stross het de het so Metallchugele drin, dos so kei Gschwindigkeitsbegränzig git und s au niemer würd interessiere, baut me halt eifach Hinderniss in d Stross i.

So zu de Autos, do s stärckere gwünt hets viel Chip unterwägs. De find ich au speziell das vil Autos rundume tönti Schiebe hei, also au d Frontschiebe! Ich frog mich öb die überhaupt usegsehnd in dr Nacht. Unses Büsli het eifach bim Fahrer ä tönti Schibe und wenn er telefoniert kurblet er die ufe, so das d Polizei ihn nid gseht :-), wie praktisch. Agurte, das funktionert bi de meiste Autos mit Glück grad bim Fahrer und Bifahrer. Denn ä maximali Sitzplatzzahl, jo was söll ich euch do säge, eifach überall dört wo es Füdli platz het zum sitze. Oder stehend bime Chip hindedruf wo bis Obe mit Banane belade isch und de s Gfühl hesch de rutscht jetzt de jedä Momänt ab.

Wie chunt me do zu me Fühereruswies: Klar me chan ä Prüefig mache und die bestoh, en anderi Variante isch me zahlt eifach gnue und bechunt d Lizenz ohni das me jemols mit emä Auto gfahre isch. We me no bitz me zahlt chunt me au zume internationale Uswiess.

Haltet eim mol en Polizist a und er het s Gfühl das me gegä ä Reglä verstosse het, die exsistiere glaub nid schwarz uf wiiss, de het me Variante A: Er nimmt eim dr Urswies wäg und zahlt em Staat en horändi Buess oder Variante B: Me besticht dr Polizist und er nimmt s Gäld in si eigene Sack oder Variante C: Me git dr Uswies ab, fahrt de natürli ohni ume. Do me jo Kollege bi dr Polizei het wo chli Ranghöcher sind als so ä Strossepolizist, loht me sich über dä, d Buess striche und me het in erä Wuche dr Uswies wieder zrug.

So mini Gastmueter het also Variante B und C scho Usprobiert sit ich do bin. Die Buess wo si nid muess zahle isch natürli völlig ungrächtfertigt gsi und däm wo si chli Gäld geh hat, das isch natürli ganz ä tschenti Geste gsi vo ihre, do so Strossepoliziste kei grosse Lohn hei :-)

Es isch also ganz amüsant und musikalisch do uf de Strosse. Zwei mol churz Huupe heisst nämli danke, eimol lang so vil wie beweg mol di Chare do wäg!

Feria International

2008-09-29T20:43:00.000-07:00

Feria International

Am Samstig 27. Septämber hei mir alli unsi Länder vorgstellt. Für zum d Schwiz z representiere hei d Katharina und ich Zopf bache und Rahmtäfeli gmacht und das ohni Woog! Doch si sind sehr beliebt gsi bim Publikum. Zur Unterhaltig isch ä traditionelli Tanzgruppe cho und nochher het ä typisch Honduranischi Muusig gspilt. Das isch spannend gsi zum luege und lose.

Dr Taiwan - Stand isch voll dr Renner gsi, do alli ihre Name uf chinesisch hei wölle. Ich ha mine ( Ursi ) de au lo schribe und ha richtig freud an dr bedütig vo de Zeiche: S erstä Zeiche isch en Vogel, s zweite au und s dritte bedütet fröhlich, ufrichtig. Ich dänk das passt zu mir.

Am Obe si mir de alli zäme in Usgang, das isch lessig gsi. Do in Tegus muess eifach jede Club am 2.00 d Türe schliese ( ä Regle vo dr Regierig, gege übermässige Alkoholkonsum ) , das heisst am halb zwei stelle si d Musig ab. Das isch mega schad... Je nach däm fiire d Lüt de eifach bi öperem dehei witer. Mir hei an en After -Party usserhalb vo Tegus wölle, doch wo mir dört gsi sind, hei mir gmerkt das es voll dr flop isch und so si mir de hei.

min Erfolg :-)

2008-09-25T12:51:00.000-07:00

Hüt han ich Zit zum schribe, do mich s Büssli nid mitgnoh het. Es Chind het für ä Impfig in Spital müese und nach 2h warte han ich dänkt das ich mir doch en gmüetliche Tag dehei cha mache. Doch die Wuche han ich drei Täg voll gschafft und ich bi gschafft gsi. Ich han doch nid in dr Schuel, sondern in dr Physiotherapie mich betätigt. Es isch eifach genial und ich bi mega glücklich dört. Mini Massage si sehr beliebt vor allem au unter de Agstelltä :-) Am Mentig han ich mi erstä Tag dört gha und ha mit dr Therapeutin zäme Üebige mit de Chind gmacht. Das brucht zimmli Chraft, mol luege öb i es paar Armmuskle cha zueleggä. Am Nomittag het si de zu mir gseit: "Lueg do d Kata darfsch massiere, dr ganzi Körper, so wie ichs glehrt heigi" Do bin ich doch sehr überrascht gsi, doch ich ha mi mit freud an d Arbet gmacht. Es isch nid ganz eifach gsi, dr ganz Körper isch total verspannt gsi und si het en spezielli Haltig gha. Noch erä Stund isch d Pflegmueter cho ihres Chind hole und d Therapeutin het voller Stolz verzellt das mir do ganz es entspannts Chind heige. Anschienend isch d Kata eini wo immer um sich schlot und nie ruhig isch, do bi miner massage het si das nie gmacht. Do bini doch scho sehr stolz gsi. Therapeutin het gmeint, si möcht umbedingt lehre z massiere und het s Erläbnis mit dr Kata allne verzellt wo uns so begegnet sind. Do bim ich glücklich und todmüed am sechsi in Tegus a cho.

Agafam

Agafam

Am Sunntig si mir so ame Märt gsi, es het so chli Cowbystimmig gherscht do si dört au ihri Rösser pressentiert hei. Ich bi mit ä hufe Taiwaner dört gsi und was für si unverständlich gsi isch, das ich mir KEIS Souvenier kauft ha :-)

1. Arbetsdag und anderi Erläbnis

2008-09-20T08:23:00.000-07:00

2 Täg spöter als plant han ich de doch min erste Arbetsdag gha. Doch ich würd jetzt das als en typischi honduranisch Verzögerig betitle. Am Dunnstig bin ich ca. ä Stund bi dr Tankstell gstande wo mi dr Bus hät sölle abhole, d Elly d Organisatorin het eifach s Natel nid abgnoh und so bin ich zimmli enttüscht und frustriert wieder hei gange. Doch am Fritig hets de klappet, jupii :-)
Mis Projekt lit öpä ä 1/2 Stund vo Tegus entfärnt in Valle de Angeles. Zmits im Grüene isch wie es chlises Dorf mit 12 Hüser, s SOS Chinderdorf. S Speziele a däm SOS Projekt isch das d Chinder nid "nur" Waisechind sind sonder au Behinderet (mental und körperlich). Dos in Honduras keis so guet funktionierends Sozialnetz het, gits für die Chinder au kein andere Platz, so bliibe si ihr Läbe lang dört.Ich ha zwüsche 6 und 27 jöhrigi kenneglehrt, wirde si jetzt trotzdäm witerhin Chinder nenne, do si mir au immer vo de niñios verzelle. In dene Hüser läbe si wie in erä Familie, es sind immer ca. 9 Chinder i eim Huus.
Dört acho han ich denn erfahre, das me mich zur unterstützig in dr Schuel zueteilt het. Das tönt für mi spannend und i bi gspannt was uf mi zue chunt. Am Fritig hei si en spezielle Dag, nämli Sportdag. Mit 9 Chinder si mir go Botscha spiele. Mit vile härzliche Umarmige, zueklatsche und afüüre han ich dr mit zueluege vom Botschaspiel verbrocht. Am Schluss het jedä es Abzeiche becho und uf das si si soooo stolz gsi, das isch mega schön gsi.
Bim Zmittag han ich de mis Vegetarier do si in Windgschosse und dr Eitopf gässe, ohni Fleisch wär er natürli besser gsi :-)
Denn hei si mir 4 Celebralglähmti Chinder vorgstellt, das het mi scho troffe, wil si eifach nur chöne dört ligge. Oder ein, de ghört fast nüt, aber er het kei Hörgrät ( weiss nid öb si das do überhaupt kenne), drum schreit me ihm halt eifach ins Ohr!
Mi erste Iidruck isch würkli sehr positiv und ich ha mi willkomme gfühlt im Projekt und ich wirde sicher no me brichte.

Basketball

Mini Gastmuetter isch en agfrässeni Basketballspielere und so bin ich zu erä Basketball - Lektion cho. Bis jetzt han ich mi ufs zueluege konzentriert, doch am Dunnstig han i mi nüm chöne drücke. Ok, am afang hei mir so es paar gschiklichkeitsüebige gmacht, die hei mir au gfalle, denn hei mir es Mätchli gmacht. Mir, das si zwoi "alti" Basketballhase, mini Gastmueter und ihri Kollegin und zwoi jungi Greenhorns dYi und ich. Ich ha mit miner ehrgizige Gastmueter zäme gspielt. Spielstand 14:21 (für uns :-) ) D Yi japst nur no und het voll kei chaft me, i bi au scho rot wie ä Tomate, aber nüt isch es Spiel goht bis 31 Pünkt. Mini konzentration isch dahin und ich triff praktisch kei Chorb me und mir schleife eus mit de letschde Chräft zum ändi vom Spiel. Mir gwünne 28:31. Noch 5 Minute Pause meine unsi Señoritas: revanche. Was?!? Nei, do möche mir zwei sporltiche Luschene jetzt würkli definitiv nid mit! So wärde mir no zu 10 Rundene jogge verchnurrt, do bin ich wieder voll derbi. Doch d Yi schlurft nur no so hinder eus dri und isch zimmli am Ändi!
Ich ha dr Suyapa jetzt gseit das Basketball nid so min Sport isch und si meint villicht finde mir no öpis anders für mi. Ich halt euch uf em laufende :-)

http://picasaweb.google.com/ursi.hilber/Basketball#

Sicherheit

Es paar hei mi gfrogt was es de genau bedütet, das es so gföhrlich isch. Ich mach en Versuech z erkläre.
Do so ä Armuet herscht in Honduras, ghöre Überfäll zum Alltag. Das heisst au, das es Natel oder en Kamera Grund gnue isch zum eim Uszraube. Drum duet me nid uf dr Stross oder in dr Stadt telefoniere oder fotografiere, s Natel isch natürli uf lutlos. S Gäld duet me sicher an 3 verschiedene Orte verstecke, damit noch emä Überfall immer no Gäld hätsch für dr Bus oder es Taxi. Es isch halt so das ich zerst überleg, wo gang ich hi, wievil Gäld bruch ich ca. und so vil nimm ich denn mit. Ich ha umgrächnet ame nur ca. 15-20 Fr. derbi.
Kidnapping isch eher sälte und het meistens Politischi hindergründ, doch es isch halt Tatsach das täglich Lüt stärbe wäg dr Kriminalität. Doch bis jetzt han ich zum Glück no nüt so erläbt und i wird mich au wieterhin an d Sicherheitsregle halte und mini Sache hergeh, wenn mi öper wott Überfalle. Denn passiert eim zu 99% nüt.

Was letscht Wuche so alles gsi isch

2008-09-15T15:53:00.000-07:00

http://picasaweb.google.com/ursi.hilber/Honduras1#

Flagge vo Honduras, die beide blaue Streife symbolisiere s Meer (Karibik und Pazifik), weiss isch s Land und es Symbol für Friede, die fünf Stärne stönd für Central Amerika (5 Länder)

Fuessballmatch

Ich bi mit miner Gastschwöster, ihrem Fründ und dr Maggie go en Match luegä. Es het in ströme grägnet und drum nid so viel Lüt gha, trotzdäm han ich sehr vil iidrück mitgnoh.

Gspillt hei die zwei bekanntischte Manschaffte vom Land, beidi si vo Tegus und natüli di gröste Rivale. Olympia het ä Riesige Fanclub ( vergliich: Muttenzerkurve), die sind trotz Räge voll motiviert am singe und gumpe gsi, so das s ganze Stadion vibrierrt het. Uf dr Tibüne hei dr alli öpis z trinke oder en Snack wölle verchaufe. I ha denn ä Tüte Chips gno, Handmade, de het die gueti Frau mir chli Salz drüber gstreut, ä Zitrone drüber usdruckt und no chli Tabasco dra treufflet. Denn han ich das Plasticksäckli mit fetttriefende Chips beguetachtet und Vorsichtig eis probiert, mmm es isch uuu fein gsi.

D Spieler si ufs Feld cho und einer knallerei, bengalischem Füür und Gsang isch es los gange. Papierschlang wo uf em Spielfäld glandet si, het me eifach lo ligge, so das d Spieler dört jedesmol drübergstolperet si!

D Stimmig isch speziell gsi: Dr Räge het abeprasslet, im Hintergrund het me die belüchtet Jesusstatue uf em Bärg gseh, d Fädermüss sind dur d Nachtgschwirrt, d Olympia- Fans hei ihri Spieler a gführt und unde uf em Spielfäld isch scho fast unschienbar es Fuessballspiel gloffe. Ohni Komentator oder Azeigetafele.

s Spiel het Olymia 2:0 verlohre, si säge das isch will ihri 7 bestä Spieler im Nationalteam sind und um d WM teilnahm kämpfe. Bis jetzt erfolgrich vo 3 Match hei si 2 gwunne :-) I bi jetzt natürli voll en Honduras Fan....

Mont Picacho

Am Fritig si mir mit em spanisch uf ä Mont Picacho, dört obe het me ä grandiosi Ussicht über Tegus und ihres Symbol vo dr Stadt, ä überdimensionali Jesusstatue stoht dört.

Schwiizer Bäckerei

Mir hei gört das es in dr Stadt ä Bäckerei vome Schwiizer git, so hei mir drü Schwiizer uns ufe Wäg gmacht. In dr hoffnig äntli wieder mol es chnusprigs Brot mit Rauft z becho und nid nur das schwabel Brot im Plasticksack. Mir sind nid entdüscht worde, mir heis richtig zelebriert in das Brot z bisse, mmmm ä Traum.

Denn isch unverkennbar en Schwiezer uftaucht, mir hei dänkt es sig dr Zürcher Bäcker (es si Zürcher Autonummere ufghänkt gsi). Doch dr pensionierti Ueli isch us em Aargau und leitet die Bäckerei do dr Zürcher verstorbe isch. Er het vil z Verzelle gwüsst. Vor allem über die unklari Politischi Lag wo im Momänt herscht. Jetzt sind si no än Demokratie doch dr jetztig Presidänt isch me für en Diktatur und das hät schlimmi Folge mit dr Beziehig zu USA. Vieli Honduraner läbe do vo däm Gäld wo ihri Verwandte in de USA verdiene, doch d USA chönt dä Gäldstrom unterbinde. Was de halt no me Armuet bedüdet.

Er het au gseit das wo er vor 30 Johr nach Honduras cho isch no kei einzigi teerti Stross geh het! Jetzt si si teeret mit viiile, viile Schlaglöcher:-) Do het me Vo San Pedro Sula nach Tegus 7 Tag brucht und jetzt sis no 4 -5 Stund.

Das mir guet sölle uf eus Ufpasse und das mir jederzit zu ihm chöne cho we öpis isch er hälfi gärn, mit denä Wort hei mir eus denn uf dr Heimwäg gmacht.

Abschiedsfest

D Andrea, mini Gastschwöster fliegt am Ziestig nach Frankrich, und mir hei do es lustigs Festli im Huus gha und ich ha es paar vo ihrne Cousins und Cousine kenneglehrt und no Kollege. Zum Glück chöne die änglisch. Mit emä Tequilla hei mir de uf es guets Johr a gstosse.

15. Septämber

Das isch dr Nationalfiirtig vo Honduras. Do hei si so ä Parade dur d Stadt, es het bitz öpis vo Fasnacht. Es sind alles Schüeler wo öpis Presentiere. Äntweder d chicas, wo es Tänzli mit em Stöckli oder Pompoms mache und en internä Wettbewärb isch wär s chürzere Röckli het. Oder d Muusig, do hei mir ganz unter schiedlichs ghört, so chli Marschmuusig. Die bestä möche mit de Instrumänt ä Choreo.S dritte isch denn so richtig Militär mesig, im glichschritt präsentiere si ihr könne.

Jetzt am Obe gohts de los mit Führwärk....

Ussicht über d Stadt

2008-09-10T20:00:00.000-07:00

http://picasaweb.google.ch/ursi.hilber/Tegucigalpa#

Am Ziestig bin ich mit dr Heida und dr Yi, zu me Ussichtspunkt ufe gloffe. De hei mir es paar Föteli gmacht. Tegus bestoht eigentlich us 2 Städt, wo dur dr Rio Grande (na ja, soo gross isch er jetzt au wieder nid) trennt si. Die Stadt links vom Fluss heisst Comeyagüela und rechts isch ebä Tagucigalpa.Obe hets ä Schuelklass gha wo für dr Nationalfiirtig güebt het. Dä isch am 15. Septämber und de möche si en Marsch durch d Stadt.
Uf eusem Wäg si mir an de ärmlichste behuusige verbi gloffe. D Lüt hei nid unglücklich usgseh, mir hei eus eifach gfrogt öb die Chind in d Schuel dörfe...
Am Schluss si no es paar Föteli vo ICYE Lüt.

2008-09-05T17:52:00.000-07:00

http://picasaweb.google.com/ursi.hilber/ChidrensDay#

Am 30. August si mir mit ICYE in es Dorf gange und hei dört mit de Chinder dr Childrens Day gfiert. Mir hei mit ihne Spieli gmacht und Gschänkli mitbrocht. Typisch für Honduras isch das Spiel mit de Piñatas. Das si die lustige Grepp-Papier-Figure uf de Föteli. Die sind gfüllt mit Süessigkeite,de darf jedes Chind ca. 3 mol mit em Stäcke an die ufghänkti Piñata schlo. Irgendeinisch git si de kaputt und tätää... d Süessigkeite und Konfetti purzle use und Chinder stürze sich druf :-)

De bi ni no go Basketball zueluegä, mini Gastmuetter spielt sehr guet und mit viel Ehrgiz. D Yi hets au versuecht und isch nochher voll ko gsi.

Dä süessi Bueb am Schluss isch dr Sohn vo dr Putzfrau, wo bi miner Familie täglich chunt cho putze und choche.

Choche cha si uuh fein und so das für alli öpis derbi isch. So iss ich nid umbedingt sehr traditionell, doch umso leckerer. Wes nüt het für mi de chan ich mir sälber öpis choche. Gmeinsam gässe wird eigentlich nie. Es luegt chli jedä für sich.

Übrigens es isch jo Rägezit so isch es zwar meistens warm, doch es Rägnet au immer wieder ä mol.
Drum han ich mini Rägejagge immer derbi :-)

Mini Erläbnis

2008-09-01T17:56:00.000-07:00

Mini Gsundheit

Vil vo euch hei mir gwünscht das isch gsund zrug chum, drum fang ich mit derä a. Ich bi fit und munter, ha keini Mage-Darm Problem wie si doch oftmols vorchöme.
Doch trotz Anti-Brumm und däm Anti-Mugge Spray do vo Honduras, wo übrings fein nach Orange duftet und nid stinkt, bin ich voll verstoche. D Gfahr vo Malaria isch do in Tegus sehr chli, doch Dengue - Fieber wo au über d Mugge übertreit wird isch verbreitet. Do gits au, usser Schmerzmittel, kei Medikament. So ich gib mis bestä, dass mi kei versüchti Mugge pickst.

Das chunt mir spanisch vor...

Hüt het mi Sprochkurs a gfange, das isch würkli super und i bi voll motiviert die Sproch z lehrä. I mim Zimmer han ich überall Post-its verteilt und die Sache a gschribe, damit ich möglichst gli en Wortschatz zäme ha.
Denn es isch en HORROR, ich dänk in Änlisch, hilfe!!! Das isch halt wil ich mit miner Familie und de andere Ustuscher in Änglisch due komuniziere. Doch mi Gastmueter, Suyapa, het agfange s zerst in spanisch z säge und de mirs is änglisch z übersetzä. Das find ich super.

Tegucigalpa

Churz Tegus, isch ä Stadt wo in grüene Hügel lit, ehemaligi Silbermine. überall hets chli Bäum und Wiese, das gfallt mir sehr. Doch in derä Stadt, wo en Abgastest sicher es Fremdwort isch, stinkts pestialisch, vor allem im Centro. Dr Verchehr isch total chaotisch und immer begleitet vo me "melodiöse" Hupkonzert. Bus fahre isch es Abentür, ich finds bis jetzt no cool, doch vili vo eus Ustuscher verzichte gärn druf un näme s Taxi. Sobalds dunkel isch, isch es sowieso vil z gföhrlich die öffentliche Verchersmittel z neh oder z Fuess unterwägs zsi. Dir chönet euch sicher vorstelle, dass das nid so eifach isch für mi.
Überfäll ghöre do zum Alltag und si hei eus mit Tipps guet druf vorbereitet. I bi do sehr zueversichtlich das mir nüt gröbers passiert. I ha kei Föteli, dos nid sinnvoll wär in dr Stadt d Kamera uszpacke und dene z zeige das me ä Digicam het, Überfallgfahr!
Es git do no einiges z Entdecke für mi....

Usgang

Am Samstig bin ich mit miner Gastschwöster und Fründe in Usgang. Jä, jä die Latinos, do duet eifach jedä tanze und singe, do goht öpis :-)
Stimmig isch einmalig und en Piña Colada han ich gha, ich säg euch en Traum. Choste duet er au fast nüt, 75 Lempira das si Fr. 4.50.
Do bi ni doch voll im Elemänt. Schad isch, dass wenn mini Gastschwöster abreist nach Frankrich, denn weiss ich nid wie und öb ich no furt chan, sniff.

Chile

Es wird vo mir erwartet das ich mit ind Chile gang, so bin ich also am Sunntig ind 6i Mäss am Obe. Die hei am Sunntig ca. 5 Mässene!!
D Musig het gfägt, dr Pfarrer han ich nid verstande und mir hei eus alli härzlich umarmt und uns la paz, Friede, gwünscht. So es isch also ganz ok gsi. Dr August isch in Honduras dr Monet vo dr Familie und wil gester dr letschti Dag vom August gsi isch het me sich als Familie chöne sägne lo.
So si mir jetzt als Multi-Kulti-Familie gsägnet: Suyapa (Mueter), Andrea (Tochter), Yi (Taiwanesin) und ich.
(Dr Vater isch in dr Schwiz, in Basel, bi siner Tochter us erster Ehe)

mis Amigos

Am meiste bi ni, wie chönts ächt anders si, mit mine zwei Schwizer - Girls unterwägs. Doch in 2 Wuche werde si Tegus verloh und in ihri Projekt abzwitschere,tja, doch mir werde sicher in Kontakt bliibe.
Yi oder Maggie,d Taiwanesin wo mit mir in dr Familie läbt,isch total en liebi. Doch si hets nid so eifach. Vom sprochliche her isch es ame nid so licht si z verstoh und de chunt no ihri unterwürfigi Art drzue, dass es sehr schwer isch usezfinde was si würklich fühlt und möcht.
Oftmols chunt si mir wie es chlises Chind vor, obwohl si scho 22 isch. Mir si würkli total verschide und das machts echt nid eifacher.
D Suyapa isch total en härzlichi und ich mag si sehr guet. Si isch chli übervorsichtig, so rohtet si eus drvo ab dr Bus z benutzte. Drfür chunt si oder d Andrea uns immer und überall cho abhole. D Andrea gniesst jetzt no ihri freii Zit bevor si abreisst nach Frankrich, si stoht mir mit roht und tat bisite. Isch uu schad das si goht.
Icye und anderi Ustuscher, mir heis würkli guet unterenand und si für änand do.

Sooo das wärs gsi, liebs Grüessli

Iifüherigs - Camp

2008-08-28T16:46:00.000-07:00

Einführungs Camp

Do a däm schöne Ort, hei si uns igfüehrt i di Honduranisch Kultur. Vor allem ind Esskultur, bim richhaltige Zmorge mit Ei und Bohne, hätte es paar gern dr Teller gege es Gunfi-Schnittli tuscht.

Jetzt han ich Föteli:-)

2008-08-28T15:21:00.000-07:00

Das isch mini Familie: Ich, Yi oder Maggie, Andrea Gastschwöster, Suyapa Gastmueter

Das schöne Huus darf ich mis dehei nenne. Trotz Putzfrau, lönd die Hygienische Zueständ bitz z Wünsch übrig.

Das lit bitz do dra das en halbe Zoo im Huus läbt :-)

Mein Zuhause in Tegus

Honduras

2008-08-22T16:36:00.000-07:00

Ich bi mued, kaputt, aber ohni groesseri Zwueschefäll in Honduras a cho.
Es het ä chli Schwirigkeite geh mit em Gepäck, doch schlussendlich isch es glichzitig wie mir in Tegucigalpa gsi :-)

Ich wohn ime schoene Huus und ha es riesigs Zimmer mit eignigem Bad für mi.
Also möchets guet mini liebe:-)

2008-08-20T13:45:00.001-07:00

Abschiedsfest

Abschiedsfestli

2008-08-20T12:59:00.000-07:00

Merci viel,viel mol für all die guete Wünsch vo euch. Do cha jo nüt me schief go. Ich ha mi mega gfreut euch alli nomol z gseh.
Ha euch mega lieb und freu mi uf mis Uslandjohr.
I mim härze nimm ich euch alli mit uf mini Reis :-)

Jetzt weiss ich meh....

2008-08-12T05:43:00.000-07:00

In Honduras wird ich in dr Hauptstadt Tegucigalpa läbe. In erä Familie wo d Töchtere in Europa si und ich mit erä Tailändere darf bi Ihne wohne.

Mis Sozialprojekt wo ich wird schaffe isch in Valle de Angles. Es isch es SOS-Kinderdorf wo Behinderti Chinder läbe.

Jetzt gohts de nur no ä Wuche.....

21. August

2008-07-14T07:05:00.000-07:00

Am 21. August gohts los, denn flieg ich ab nach Honduras.
Was chunt uf mich zue?
Ich freue mich riesig und bin au scho mega gspannt :-)

Bis denn gniess ichs no do mit miner Familie und Fründe in dr Schwiz.